បន្ទាយមានជ័យ: បុរសម្នាក់បានស្លាប់ភ្លាមៗនៅនឹងកន្លែងកើតហេតុ និងម្នាក់ទៀតបានរងរបួសធ្ងន់ បន្ទាប់ពីជិះម៉ូតូឌុបគ្នា ត្រូវរថយន្ត២គ្រឿងបុក កាលពីវេលាម៉ោងជា១០និង៤៥នាទីព្រឹកថ្ងៃទី១០ ខែតុលា ឆ្នាំ២០១៦ នៅលើកំណាត់ផ្លូវជាតិលេខ៥ ចំណុចមុខការ៉ាស់សាំង ក្នុងភូមិសាលាក្រហម ឃុំសំរោង ស្រុកអូរជ្រៅ ខេត្តបន្ទាយមានជ័យ។

សាក្សីនៅកន្លែងកើតហេតុបានឲ្យអង្គភាព Post news ដឹងថា មុនពេលកើតហេតុមានរថយន្តកាមរី៩៥មួយគ្រឿងបើកបរពីកើតទៅលិចមកដល់ចំណុចកើតហេតុបានបត់ចូលការ៉ាស់សាំងមួនៅខាងឆ្វេងដៃ ក៏ជ្រុលទៅបុកម៉ូតូមួយគ្រឿងជិះគ្នា២នាក់ បើកបរច្រាសទិសគ្នាបណ្តាលដួលខ្ទាតជនរងគ្រោះម្នាក់ទៅបោកក្បាលនឹងកញ្ចក់ធ្លាក់លើថ្នល់ ក៏ត្រូវរថយន្តកាមរី៩៥មួយគ្រឿងទៀត បើកស្របទិសពីក្រោយកិនជនរងគ្រោះស្លាប់មួយរំពេច ចំណែកជនរងគ្រោះម្នាក់បានខ្ទាតចូលក្នុងប្រឡាយរបួសធ្ងន់។

ភ្លាមៗនោះ សមត្ថកិច្ចនគរបាលចរាចរណ៍ផ្លូវគោកនៃអធិការស្រុកអូរជ្រៅបានចុះទៅដល់កន្លែងកើត ហើយបានពិនិត្យលើជនរងគ្រោះរកឃើញអត្តសញ្ញាណជនដែលរងរបួសធ្ងន់ មានឈ្មោះ ពិក សាប៉ុន ភេទប្រុស អាយុ២៩ឆ្នាំ រស់នៅក្នុងភូមិប្រដាក ឃុំព្រៃជ្រូក ស្រុកពួក ខេត្តសៀមរាប រីឯអ្នកស្លាប់មិនទាន់ស្គាល់អត្តសញ្ញាណនៅឡើយ។

បច្ចុប្បន្នសមត្ថកិច្ចកំពុងតែធ្វើការវាស់វែង និងនាំយករថយន្តបង្កទៅរក្សាទុកនៅអធិការដ្ឋាន សាកសពត្រូវយកទៅតម្កល់ទុកនៅក្នុងវត្តរង់ចាំស្រាវជ្រាវរកក្រុមគ្រួសារមកទទួល។ ចំណែកអ្នករងរបួស ត្រូវបានដឹកបញ្ជូនទៅកាន់មន្ទីរពេទ្យបង្អែកស្រុកអូរជ្រៅ៕