ភ្នំពេញ: គ្រោះថ្នាក់ចរាចរណ៍មួយបង្កឡើងដោយបុរសជនជាតិអាមេរិចម្នាក់ បានបើករថយន្តក្នុងល្បឿនលឿនដូចហោះ ជ្រុលទៅបុកម៉ូតូហុងដាសេ១២៥ ដែលកំពុងជិះឌុបគ្នាដោយយុវជន២នាក់យ៉ាងពេញទំហឹងបណ្តាលឲ្យយុវជនម្នាក់ស្លាប់បាត់បង់ជីវិត និងម្នាក់ទៀតរងរបួសយ៉ាងធ្ងន់ធ្ងរ ។

ហេតុការណ៍នេះបានកើតឡើងកាលពីវេលាម៉ោង១០និង១០នាទីយប់ថ្ងៃទី១០ ខែតុលា ឆ្នាំ២០១៦ ស្ថិតនៅតាមបណ្តោយផ្លូវលេខ៥៩២ កែងនិងផ្លូវលេខ៣១៧ ក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុគេបានឃើញ រថយន្តម៉ាក Land Rover and Rover Discovery3 ពណ៌ខ្មៅ ពាក់ស្លាកលេខភ្នំពេញ 2AC-1417 បើកបរដោយបុរសជនជាតិអង់គ្លេសម្នាក់ ក្នុងល្បឿនលឿនដូចហោះតាមបណ្តោយផ្លូវ៥២៩ ក្នុងទិសដៅពីកើតទៅលិច លុះបានមកដល់ចំណុចកើតហេតុ ស្រាប់តែរថយន្តខាងលើបានរេចង្កូតទៅបុកជាមួយនឹងម៉ូតូម៉ាកហុងដាសេ១២៥ ពណ៌ខ្មៅ ពាក់ស្លាកលេខ ភ្នំពេញ 1H-2202 ដែលកំពុងជិះឌុបគ្នាដោយយុវជន២នាក់ ធ្វើដំណើរតាមបណ្តោយផ្លូវ៣៧១ ទិសដៅពីត្បូងទៅជើង ក្នុងល្បឿនលឿនដូចគ្នា រួចក៏បុកគ្នាបុកពេញទំហឹង បណ្តាលឲ្យរថយន្តបង្កបុកនិងកិនអូស ជនរងគ្រោះរួមនឹងម៉ូតូបណ្តាលឲ្យយុវជនទាំង២នាក់រងរបួសយ៉ាងធ្ងន់ធ្ងរ ត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យ ប៉ុន្តែជាអកុសលពេលទៅដល់មន្ទីរពេទ្យយុវជនម្នាក់បានដាច់ខ្យល់ស្លាប់បាត់ទៅហើយដោយសារតែអាការ:ធ្ងន់ធ្ងរខ្លាំងពេក ចំណែកម្នាក់ទៀតរងរបួសធ្ងន់កំពុងស្ថិតក្នុងបន្ទប់សង្គ្រោះបន្ទាន់។

បន្ទាប់ពីកើតហេតុ សមត្ថកិច្ចនគរបាលចរាចរណ៍ខណ្ឌទួលគោក សហការជាមួយនិងនគរបាលជំនាញចរាចរណ៍រាជធានីភ្នំពេញ បានចុះមកធ្វើការវាស់វែងនិងធ្វើកំណត់ហេតុរួច សមត្ថកិច្ចបានយករថយន្តនិងម៉ូតូរួមទាំងអ្នកបើកបររថយន្ត ទៅកាន់ការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយរង់ចាំធ្វើការដោះស្រាយគ្នាតាមផ្លូវច្បាប់ ចំណែក សាកសពជនរងគ្រោះត្រូវបានសមត្ថកិច្ចប្រគល់ទៅឲ្យក្រុមគ្រួសារ យកទៅធ្វើបុណ្យនៅខណ្ឌសែនសុខ៕