ភ្នំពេញ: នៅថ្ងៃទី១០ ខែតុលា ឆ្នាំ២០១៦ នៅទីស្តីការក្រសួងសាធារណការនិងដឹកជញ្ជូន ឯកឧត្តមទេសរដ្ឋមន្ត្រី ស៊ុន ចាន់ថុល បានជួបពិភាក្សាការងារជាមួយលោកRaymond Yip អនុប្រធាននាយកប្រតិបត្តិផ្នែកទីផ្សារនៃក្រុមប្រឹក្សាអភិវឌ្ឍពាណិជ្ជកម្មទីក្រុងហុងកុង (HKTDC)។

លោក Yip បានសម្តែងនូវការកោតសរសើរចំពោះលោកទេសរដ្ឋមន្រ្តី ដែលបានផ្តល់ការគាំទ្រដល់ HKTDC និងបានសម្តែងចំណាប់អារម្មណ៍ ក្នុងការលើកកម្ពស់ឱកាសថ្មី នៃការវិនិយោគលើវិស័យហេដ្ឋារចនាសម្ព័ន្ធនៅកម្ពុជា។

ក្នុងនោះដែរ លោកទេសរដ្ឋមន្រ្តី បានថ្លែងការកោតសរសើរចំពោះកិច្ចសហប្រតិបត្តិការយ៉ាងរឹងមាំរបស់ HKTDC និងបានប្តេជ្ញារួមចំណែកដល់ការអភិវឌ្ឍន៍ហេដ្ឋារចនាសម្ព័ន្ធរបស់កម្ពុជា។ លោកទេសរដ្ឋមន្ត្រីបានជម្រាបជូនលោក Yip អំពីគម្រោងនានារួមមាន៖ “រថភ្លើងលើអាកាស(ស្កាយត្រេន)” រថភ្លើងក្រោមដី និងប្រព័ន្ធឡានដឹកជញ្ជូនប្រើផ្លូវដែក (Tramways) ដែលវិនិយោគិនទីក្រុងហុងកុងអាចពិចារណាលើការវិនិយោគបាន។

លោកទេសរដ្ឋមន្រ្តី ស៊ុន ចាន់ថុល បានស្នើឲ្យលោក Yip ជំរុញលើកទឹកចិត្តក្រុមហ៊ុនហុងកុងទាំងឡាយឲ្យមកទស្សនាកម្ពុជាដើម្បីស្វែងយល់ឲ្យបានច្បាស់អំពីការអភិវឌ្ឍហេដ្ឋារចនាសម្ព័ន្ធរបស់ប្រទេសនេះ និងបានសន្យាភ្ជាប់ទំនាក់ទំនងការងារឲ្យកាន់តែជិតស្និទ្ធថែមទៀតជាមួយ HKTDC ក្នុងកិច្ចខិតខំប្រឹងប្រែងដើម្បីទាក់ទាញ វិនិយោគិនពីទីក្រុងហុងកុង ៕