កោះកុងៈ កម្លាំងការិយាល័យប្រឆាំងបទល្មើស នៃស្នងការនគរបាលខេត្តកោះកុង កាលពីល្ងាចថ្ងៃទី១១ តុលា ម្សិលមិញ បានចាប់ខ្លួនយុវជនម្នាក់ ជាមេការផ្ទះសំណាក់យីហោតាម៉ាប់ ស្ថិតក្នុងភូមិ១ សង្កាត់ស្មាច់មានជ័យ ក្រុងខេមរភូមិន្ទ ទៅតាមដីការបស់សាលាដំបូងខេត្តកោះកុងពាក់ព័ន្ធនឹងករណីជួញដូរគ្រឿងញៀន កាលពីឆ្នាំ២០១៥។

ក្នុងការចាប់ខ្លួននោះ សមត្ថកិច្ចក៏បានឈានទៅរកឃើញនូវអាវុធខ្លី១ដើម ម៉ាកប្រាស់ហា និងគ្រាប់ចំនួន៤គ្រាប់ផងដែរ និងបានធ្វើការចាប់ខ្លួនជនសង្ស័យឈ្មោះ ថង់ ស៊ាងថៃ ហៅថៃ ភេទប្រុស អាយុ៣១ឆ្នាំមកជាមួយ ។

បច្ចុប្បន្នជនសង្ស័យត្រូវបានសមត្ថកិច្ចកសាងសំណុំរឿង និងបញ្ជូនទៅកាន់សាលាដំបូងខេត្តកោះកុងដើម្បីចាត់ការទៅតាមនីតិវិធីច្បាប់៕