ឧត្តរមានជ័យ: នគរបាលវរការពារព្រំដែនគោកលេខ៩០៥ ខណ:ដើរល្បាតតាមខ្សែបន្ទាត់ព្រំដែនកម្ពុជា-ថៃ ស្រាប់តែជាន់មីនសល់ពីសម័យសង្គ្រាម បណ្តាលឲ្យផ្ទុះដាច់ជើងខាងស្តាំ និងរបួសជើងខាងឆ្វេងយ៉ាងធ្ងន់ធ្ងរ ត្រូវបានដឹកបញ្ជូនទៅព្យាបាលនៅមន្ទីរពេទ្យ ប្រទេសថៃ។

លោកវរសេនីយ៍ឯក ស៊ុ សារឿង មេបញ្ជាការនគរបាលវរការពារព្រំដែនគោកលេខ៩០៥ បានឲ្យដឹងថា កាលពីវេលាម៉ោង៧និង៤៧នាទីថ្ងៃទី១២ ខែតុលា ឆ្នាំ២០១៦ កម្លាំងរបស់លោក ដើរល្បាតតាមខ្សែបន្ទាត់ព្រំដែន កម្ពុជា-ថៃ មានគ្នាចំនួន៥នាក់ ដឹកនាំដោយលោក អនុទោ យ៉ាន់ ចន្ថា នាយរងប៉ុស្ដិ៍ បានដើរល្បាតសហការជាមួយយោធា ផ្នែកសឹករងស្រុកអន្លង់វែងចំនួន ៥ នាក់ ដឹកនាំដោយលោក ឡោយ ឡាយ មេបញ្ជាការរងកងអនុតូចលេខ២ គ៧ ល្បាតពីចំណុចសីម៉ាលេខ១០ទៅលេខ៩ ពេលនោះ រហូតដល់ម៉ោង៨ និង០០នាទី ថ្ងៃទី១២ ខែតុលា ឆ្នាំ២០១៦ លោកពលឯក អៀង សុដន បានដើរជាន់មីនស្កូ ប្រភេទK៥៨ សល់ពីសម័យសង្គ្រាម បណ្តាលឲ្យផ្ទុះដាច់ជើងខាងស្តាំ និងរបួសជើងខាងឆ្វេងយ៉ាងធ្ងន់ធ្ងរ។ លោក បានបន្ដទៀតថា ជនរងគ្រោះ បច្ចុប្បន្ន ត្រូវបានបញ្ជូនទៅព្យាបាលនៅមន្ទីរពេទ្យ ស្រុកកាបជើងខេត្តសុរិន ប្រទេសថៃ ដើម្បីធ្វើការព្យាបាល៕