ភ្នំពេញៈ បុរសម្នាក់កំពុងជិះម៉ូតូឆ្លងផ្លូវ ស្រាប់តែរថយន្តមួយគ្រឿងបើកបុកចំពាក់កណ្តាកពេញទំហឹង អូសម៉ូតូប្រមាណ៥ម៉ែត្រ បណ្តាលឲ្យរងរបួសធ្ងន់ ត្រូវបានមិត្តភក្តិដឹកតាមរ៉ឺម៉កម៉ូតូយកទៅសង្គ្រោះនៅក្លិនិកឯកជន។

ហេតុការណ៍នេះកើតឡើង កាលពីវេលាម៉ោង៧និង៣០នាទីថ្ងៃទី១៣ ខែតុលា ២០១៦ នៅចំណុចផ្លូវ១៩៦៦ កែងនិងផ្លូវ ១០១១ ស្ថិតនៅភូមឧកញ៉ា វាំង សង្កាត់ភ្នំពេញថ្មី ខណ្ឌសែនសុខ។ ជនរងគ្រោះមិនត្រូវបានស្គាល់អត្តសញ្ញាណ។

ប្រភពបានឲ្យដឹងថា មុនពេលកើតហេតុ គេឃើញបុរសម្នាក់ជិះម៉ូតូសង់កូរ៉េ ពណ៌ក្រហម ពាក់ស្លាកលេខ ភ្នំពេញ 1CI-5514 បើកបរម្នាក់ឯងក្នុងទិសដៅពីជើងទៅត្បូងលើកំណាត់ផ្លូវ១០១១ ខណៈមកដល់ចំណុចផ្លូវកែង ខាងលើស្រាប់តែមានរថយន្តមួយគ្រឿង ម៉ាក Range Rover ពណ៌ប្រផេះ ពាក់ស្លាកលេខ ភ្នំពេញ 2P-9080 បើកបរដោយជនជាតិកូរ៉េ ក្នុងទិសដៅពីលិចទៅកើតលើកំណាត់ផ្លូវ១៩១៦៦ ក្នុងល្បឿនលឿនជាន់ហ្វាំងមិនទាន់ក៏បុកម៉ូតូអូសប្រហែល៥ម៉ែត្រ បណ្តាលឲ្យអ្នកបើកម៉ូតូ ដួលផ្ទប់និងថ្នល់របួសធ្ងន់។

ក្រោយកើតហេតុជនរងគ្រោះ ត្រូវបានមិត្តភក្តិដឹកតាមរ៉ឺម៉កម៉ូតូយកទៅសង្គ្រោះនៅក្លិនិកឯកជន ដោយឡែករថយន្ត និងម៉ូតូត្រូវបាននគរបាលខណ្ឌសែនសុខចុះទៅវាស់វែងយកទៅរក្សាទុករង់ចាំការដោះស្រាយជាក្រោយ៕