ដោយ ៖ ឯកឧត្តម ស៊ី ជីនភីង ប្រធានាធិបតី នៃសាធារណរដ្ឋប្រជាមានិតចិន

ពីស្ថានទូតចិនប្រចាំកម្ពុជាៈ ដោយតបតាមសេចក្តីអញ្ជើញរបស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ខ្ញុំនឹងទៅបំពេញទស្សនកិច្ចផ្លូវរដ្ឋនៅប្រទេសកម្ពុជា។ នេះជាលើកដំបូងដែលខ្ញុំទៅបំពេញទស្សនកិច្ចនៅប្រទេសកម្ពុជា តាំងពីខ្ញុំឡើងកាន់តំណែងជាប្រធានាធិបតីចិនមក។ ដូច្នេះខ្ញុំពោរពេញទៅដោយការរំពឹងទុកចំពោះដំណើរទស្សនកិច្ចលើកនេះ។

ប្រទេសកម្ពុជា គឺជាតំបន់ដ៏សំខាន់នៅតាមផ្លូវសូត្រលើសមុទ្រនាសម័យបុរាណ ហើយប្រកបដោយវប្បធម៌ប្រវត្តិសាស្ត្រដ៏ត្រចះត្រចង់ និងយូរអង្វែង ក៏ដូចជាវប្បធម៌ខ្មែរដែលប្រកបដោយលក្ខណៈពិសេស។ ប្រជាជនកម្ពុជា ដែលប្រកបដោយភាពឧស្សាហ៍ព្យាយាម និងមានប្រាជ្ញាឈ្លាសវៃ ដោយបានកសាងអង្គរវត្ត ដែលជាអច្ឆរិយវត្ថុដ៏មានកម្លាំងទាក់ទាញ សំណង់ដ៏មហិមា និងចម្លាក់លៀនក៏ដូចជា គំនូរជញ្ជាំងដ៏ល្អប្រណីតបានធ្វើឲ្យអ្នកផងកោតស្ងប់ស្ងែងយ៉ាងខ្លាំង ដែលបានបន្សល់ទុកនៅទំព័រមិនចេះសាបសូន្យ នៃប្រវត្តិសាស្ត្រអរិយធម៌របស់មនុស្សជាតិ។ ក្រោយពីបានឈានចូលសតវត្សរ៍ទី២១ បុព្វហេតុកសាងប្រទេសជាតិ របស់ប្រទេសកម្ពុជាបានឈានឡើងដល់កម្រិតថ្មីឥតឈប់ឈរ ហើយកម្រិតនៃជីវភាពរស់នៅរបស់ប្រជាជនក៏ត្រូវបានលើកកម្ពស់ជាបន្តបន្ទាប់ផងដែរ ដូច្នេះអនាគតរបស់ប្រទេសកម្ពុជា គឺគួរជាទីរំពឹងទុក។

ប្រទេសចិន និងប្រទេសកម្ពុជា មានទីតាំងភូមិសាស្ត្រនៅជិតគ្នា វប្បធ៌មស្រដៀងគ្នា ហើយចំពោះការប្រាស្រ័យទាក់ទងដោយមេត្រីភាពរវាងប្រទេសទាំង២ មានប្រវត្តិសាស្ត្រជាង១០០០ឆ្នាំ។ ឆ្លងតាមរយៈផ្លូវសូត្រតាមសមុទ្រ គ្រឿងកុម្ភៈការភ័ណ្ឌ និងគ្រឿងព័រសឺឡែនរបស់ប្រទេសចិន ព្រមទាំងគ្រឿងក្រអូប និងគ្រឿងក្រមួនរបស់កម្ពុជាជាដើម ត្រូវបានផ្លាស់ប្តូរគ្នាជាបន្តបន្ទាប់រវាងប្រជាជននៃគូភាគី។ ចម្លាក់លើជញ្ជាំងប្រាសាទបាយ័ន បានបង្ហាញពីទិដ្ឋភាពដ៏រស់រវើកនៃការប្រាស្រ័យទាក់ទងគ្នារវាងពាណិជ្ជករចិន និងប្រជាជនកម្ពុជាកាលពីសម័យបុរាណ។ ពីសតវត្សរ៍ទី៥ ដល់ទី៦ ក្នុងសម័យកាលរជ្ជកាលខាងត្បូង និងខាងជើងនៃប្រទេសចិន ព្រះសង្ឃរាជ៣អង្គមានព្រះនាមសង្ឃវរ្ម័ន មណ្ឌល និងសុភូតិ បាននិមន្តទៅផ្សព្វផ្សាយព្រះធម៌នៅប្រទេសចិនជាបន្តបន្ទាប់។ លោកជីវតាក្វាន់ ប្រេសិត នៃសម័យរជ្ជកាលយាន់ប្រទេសចិន បានទៅដល់ប្រទេសកម្ពុជា និងបាននិពន្ធសៀវភៅមានចំណងជើងថា «ប្រពៃណី និងទំនាមទម្លាប់អ្នកស្រុកចេនឡា» ដែលបានកត់ត្រាអំពីប្រពៃណីនិងទំនាមទម្លាប់របស់ប្រជាជនខ្មែរ និងការប្រាស្រ័យទាក់ទងដោយមេត្រីភាពរវាងប្រជាជន នៃប្រទេសទាំំងពីរចិននិងកម្ពុជា។ លោក ហ្សឹង ហឺ (Zheng He) នាវិកក្នុងសម័យរជ្ជកាលមីងប្រទេសចិន បានស្នាក់នៅប្រទេសកម្ពុជាជាច្រើនលើកនៅពេលធ្វើនាវាចរណ៍ លោកបាននិយាយថា «នៅទីនេះមានអាកាសធាតុក្តៅជាប់ ស្រែចំការទទួលបានផលច្រើន ស្ញោរទឹកសមុទ្រធ្វើជាអំបិល ប្រពៃណីទំនៀមទម្លាប់សំបូរបែប។ វិហារសាមប៉កុង ដែលស្ថិតនៅជាយក្រុងកំពង់ចាម មានគេទៅអុជធូបជាប់មិនដាច់ដែលបានពិពណ៌នាអំពីចំណងនិស្ស័យ កាត់មិនដាច់រវាងប្រជាជន នៃប្រទេសទាំងពីរ។

កម្ពុជាមានសុភាសិតមួយឃ្លានិយាយថា «ទំនុកចិត្តប្រៀបដូចជាដើមឈើ»។ មិត្តភាពប្រពៃណីរវាងប្រទេសចិន និងប្រទេសកម្ពុជា បានឆ្លងកាត់ពេលវេលាដ៏យូរអង្វែង និងការសាកល្បងនៃការប្រែប្រួលលើផ្ទៃអន្តរជាតិដែលបានចាក់ឫសយ៉ាងជ្រៅ និងមានមែកធាងយ៉ាងត្រសុំត្រសាយដែលនេះ គឺបានមកពីការពូនជ្រុំយ៉ាងយកចិត្តទុកដាក់របស់ថ្នាក់ដឹកនាំជំនាន់ចាស់នៃប្រទេសទាំងពីរ។ នៅឆ្នាំ១៩៥៨ ប្រទេសចិន និងកម្ពុជា បានបង្កើតទំនាក់ទំនងផ្លូវទូតជាផ្លូវការ ទំនាក់ទំនងរវាងប្រទេសទាំង២ បានចាប់បើកនូវទំព័រប្រវត្តិសាស្ត្រថ្មី។ ៥៨ឆ្នាំកន្លងមក ថ្នាក់ដឹកនាំនៃជំនាន់មុនៗរបស់ប្រទេសទាំង២ បានប្រាស្រ័យទាក់ទងគ្នាយ៉ាងជិតស្និទ្ធ បង្កើតជាចំណងមិត្តភាពដ៏ជ្រាលជ្រៅ។ ព្រះករុណាព្រះបាទសម្តេចព្រះនរោត្តម សីហនុ អតីតព្រះមហាវីរក្សត្រកម្ពុជា ទ្រង់ធ្លាប់មានព្រះរាជបន្ទូលដែលពោរពេញទៅដោយមនោសញ្ចេតនាថា មិត្តភាពដ៏រឹងមាំ និងយូរអង្វែងរវាងកម្ពុជានិងចិន ហាក់ដូចជាបុបា្ផស្រស់មួយទងដែលមិនចេះរុះរោយ និងរីកស្គុះស្គាយជាអមតៈក្រោមផ្ទៃមេឃដ៏ភ្លឺស្រឡះ។ នេះគឺជាការឆ្លុះបញ្ចាំងដ៏ពិតប្រាកដអំពីចំណងមេត្រីភាពរវាងចិន និងកម្ពុជា។

ឈានចូលក្នុងសម័យកាលថ្មី មិត្តភាពរវាងចិន និងកម្ពុជា រឹតតែមានភាពរឹងមាំ ព្រមទាំងទទួលបន្ត និងផ្សាយទូលាយជាបន្តបន្ទាប់។ ប្រទេសទាំង២ មានការជឿទុកចិត្តគ្នាកម្រិតខ្ពស់លើផ្នែកនយោបាយ បានផ្តល់ផលប្រយោជន៍ដល់គ្នានិងឈ្នះ-ឈ្នះ លើវិស័យសេដ្ឋកិច្ច កិច្ចសហប្រតិបត្តិការ ដែលស្វែងរកភាពប្រាកដប្រជាលើគ្រប់វិស័យទទួលបានផ្លែផ្កាដ៏ស្តុកស្តម្ភ ហើយបានរក្សាការប្រាស្រ័យទាក់ទង និងការសម្របសម្រួលយ៉ាងជិតស្និទ្ធលើផ្នែកកិច្ចការអន្តរជាតិនិងតំបន់ អាចនិយាយបានថា គឺជាគំរូនៃប្រទេសជាសមភាគី និងធ្វើកិច្ចសហប្រតិបត្តិការដោយស្មោះត្រង់។

ឆ្នាំ២០១០ ប្រទេសទាំង២ បានបង្កើតទំនាក់ទំនងភាពជាដៃគូសហប្រតិបត្តិការ ជាយុទ្ធសាស្ត្រគ្រប់ជ្រុងជ្រោយ ទំនាក់ទំនងទ្វេភាគីបានឈានចូលសម័យកាលថ្មី។ ប្រទេសចិន និងកម្ពុជា មានភាពស៊ីសង្វាក់គ្នាកម្រិតខ្ពស់លើទស្សនៈអភិវឌ្ឍប្រទេសជាតិ បានឯកភាពគ្នាលើការពន្លឿនការតភ្ជាប់គ្នា រវាងសេចក្តីផ្តួចផ្តើមអំពីយុទ្ធសាស្ត្រខ្សែក្រវាត់មួយនិងផ្លូវមួយ និងយុទ្ធសាស្ត្រចតុកោណ។ ប៉ុន្មានឆ្នាំកន្លងមកនេះ ការធ្វើពាណិជ្ជកម្មទ្វេភាគីនិងការបណ្តាក់ទុនទៅវិញទៅមក បានរក្សានិន្នាការកើនឡើងយ៉ាងខ្លាំង ប្រទេសចិនបានក្លាយទៅជាដៃគូពាណិជ្ជកម្មធំទី១ និងប្រទេសជាប្រភពបណ្តាក់ទុនធំទី១ របស់ប្រទេសកម្ពុជា ក្នុងរយៈពេល ៣ឆ្នាំ ជាប់ទំហំពាណិជ្ជកម្មទ្វេភាគីក្នុងឆ្នាំ២០១៥ បានលើសពី ៤,៤០០លានដុល្លារអាមេរិក។

ប្រទេសចិន និងប្រទេសកម្ពុជាជាមិត្តភក្តិល្អដ៏ស្មោះត្រង់។ នៅលើបញ្ហាដែលពាក់ព័ន្ធនឹងផលប្រយោជន៍ជាស្នូលរបស់គូភាគី និងបញ្ហាដែលបានផ្តោតការយកចិត្តទុកដាក់យ៉ាងខ្លាំង ប្រទេសទាំង២ បានរួមសុខរួមទុក្ខ និងជួយយកអាសាគ្នា។ នៅក្នុងការតស៊ូប្រយុទ្ធដើម្បីដណ្តើមឯករាជ្យជាតិ និងការរំដោះជនជាតិ ក៏ដូចជាការគាំពារសុខសន្តិភាពរបស់ប្រទេសកម្ពុជា ប្រទេសចិនបានផ្តល់ការគាំទ្រយ៉ាងមុតមាំ និងជួយជ្រោមជ្រែងដល់កម្ពុជា។ នៅទសវត្សរ៍ឆ្នាំ៩០ នៃសតវត្សរ៍ មុនប្រទេសចិនបានចាត់បញ្ជូនកងទ័ពវិស្វកម្មចំនួនជាង ៨០០នាក់ ឲ្យទៅចូលរួមប្រតិបត្តិការរក្សាសន្តិភាពនៅកម្ពុជា។ ក្នុងអំឡុងពេល ១៨ខែ ពួកគេបានបញ្ចប់ភារកិច្ចកសាងនិងស្តារឡើងវិញនូវព្រលានយន្តហោះចំនួន៣ ក្នុងនោះមានព្រលានយន្តហោះអន្តរជាតិភ្នំពេញជាដើម ព្រមទាំងផ្លូវជាតិ ៤ខ្សែ មានប្រវែងសរុបជាង ៦៤០គីឡូម៉ែត្រ និងបានកសាង និងស្តារឡើងវិញនូវស្ពានជាង ៤០កន្លែង។ ពួកគេបានបណ្តុះបំប៉នចំណងមិត្តភាពរវាងចិន និងកម្ពុជា ដោយឈាមស្រស់និងញើស។

យើងខ្ញុំមិនអាចបំភ្លេចបានទេ ក្នុងគ្រាដែលប្រទេសចិន ថ្មីទើបបង្កើតឡើងបានរងនូវការបំបិទ និងការចាត់ទុកជាសត្រូវពីប្រទេសជាច្រើន ប្រទេសកម្ពុជាបាននាំមុខក្នុងការបង្កើតទំនាក់ទំនងផ្លូវទូតជាមួយប្រទេសចិន។ ក្នុងការតស៊ូប្រយុទ្ធរបស់ប្រទេសចិន ដើម្បីរៀបចំឡើងវិញនូវអាសនៈស្របច្បាប់នៅអង្គការសហប្រជាជាតិ ប្រទេសកម្ពុជាបានផ្តល់ការគាំទ្រយ៉ាងមុតមាំដល់ប្រទេសចិន។ ក្នុងពេលដែលប្រទេសចិនគាំពារយ៉ាងដាច់ខាតចំពោះអធិបតេយ្យភាពទឹកដីជាតិ និង សិទ្ធិនិងផលប្រយោជន៍នៃសមុទ្រ ព្រមនិងការខិតខំដោះស្រាយជម្លោះតាមការចរចាដោយសន្តិភាព ប្រទេសកម្ពុជាបានប្រកាន់ភាពយុត្តិធម៌និងបានបញ្ចេញមតិរបស់ខ្លួនដោយសច្ចធម៌ ។ នៅពេលខេត្ត SiChuan QingHai និង GanSu ជាដើមរបស់ប្រទេសចិនកើតមានគ្រោះមហន្តរាយធម្មជាតិយ៉ាងធ្ងន់ធ្ងរ ព្រះរាជវង្សានុវង្ស ថ្នាក់ដឹកនាំនិងគ្រប់មជ្ឈដ្ឋាននានារបស់ប្រទេសកម្ពុជាបានជួយឧបត្ថម្ភគាំទ្រដល់ប្រទេសចិន។ ជនជាតិចិនតែងតែនិយាយថា ក្នុងគ្រាជួបនឹងការលំបាក អាចមើលឃើញពីមនោសញ្ចេតនាពិតប្រាកដ។ ចំណែកសុភាសិតខ្មែរបាននិយាយថា មានតែក្នុងគ្រាលំបាកទេ ទើបអាចបែងចែកថាអ្នកណាជាមិត្តភក្តិពិត អ្នកណាជាមិត្តភក្តិក្លែងក្លាយ។ ប្រជាជនចិន និងកម្ពុជា ឲ្យតម្លៃលើមនោសញ្ចេតនា និងគោរពតាមពាក្យសន្យា គោរពរាប់អានគ្នាដោយស្មោះត្រង់ ចំណងមេត្រីភាពរវាងចិន និងកម្ពុជា បានដក់ជាប់ក្នុងក្រអៅដួងចិត្តរបស់ប្រជាជននៃប្រទេសទាំងពីរ។

ប្រទេសចិន និងកម្ពុជា គឺជាអ្នកជិតខាងដ៏ល្អដែលមានមនោសញ្ចេតនាដូចជាបងប្អូន។ ក្នុងដំណើរជំរុញកិច្ចកសាងប្រទេសជាតិ និងការអភិវឌ្ឍជីវភាពរស់នៅរបស់ប្រជាជនប្រទេសទាំងពីរ បានជួយយកអាសាគ្នាទៅវិញទៅមក។ ប្រទេសចិនបានជួយកម្ពុជាសាងសង់ផ្លូវជាតិខ្សែទី១ ដែលអាចបើកបររថយន្ត ៤គ្រឿងក្នុងពេលតែមួយ, បានកសាងរោងចក្រស៊ីម៉ង់ត៍ទី១, ស្ថានីយអគ្គិសនីដើរដោយថាមពលភ្លើងទី១ និងស្ថានីយវារីអគ្គិសនីដែលមានទ្រង់ទ្រាយធំបំផុតរបស់កម្ពុជា។ តំបន់សេដ្ឋកិច្ចពិសេសក្រុងព្រះសីហនុដែលរីកចម្រើនយ៉ាងផុសផុល គឺជាគំរូនៃកិច្ចសហប្រតិបត្តិការជាក់ស្តែងរវាងចិន និងកម្ពុជា។ គិតរហូតដល់ខែមិថុនាឆ្នាំ២០១៦ សហគ្រាសដែលបានទៅបណ្តាក់ទុននៅតំបន់សេដ្ឋកិច្ចពិសេសក្រុងព្រះសីហនុ រួមទាំងអស់មានចំនួនដល់ទៅ ១០០សហគ្រាស បើគិតជាទំហំនៃការវិនិយោគស្មើនឹង ២៨០លានដុល្លារអាមេរិក បានដោះស្រាយបញ្ហាការងាររបស់ប្រជាជនកម្ពុជាលើសពី ១ម៉ឺន៣ពាន់នាក់។ ប្រទេសទាំងពីរបានពង្រីកឧត្តមភាពបំពេញបន្ថែមគ្នាខាងផ្នែកសេដ្ឋកិច្ច ខំប្រឹងប្រែងស្វែងរកសក្តានុពល កិច្ចសហប្រតិបត្តិការខាងវិស័យកិច្ចកសាងហេដ្ឋារចនាសម្ព័ន្ធ កសិកម្ម ធារាសាស្ត្រ ប្រភពធនធាន ថាមពល ព័ត៌មាន និងទូរគមនាគមន៍ជាដើម គឺមានទ្រង់ទ្រាយកាន់តែធំឡើងឥតឈប់ឈរ និងមានកម្រិតកាន់តែខ្ពស់ទៅៗ ហើយគំរោងសហប្រតិបត្តិការពាក់ព័ន្ធមួយចំនួនទទួលបានសមិទ្ធផលជាជំហានដំបូង។

ការផ្លាស់ប្តូរខាងវប្បធម៌មនុស្សជាតិរវាងប្រទេសទាំងពីរ ចិន និងកម្ពុជា មានភាពកាន់តែជិតស្និទ្ធជារៀងរាល់ថ្ងៃ បានបន្ថែមកម្លាំងរស់រវើកសម្រាប់ទំនាក់ទំនាក់ទ្វេភាគីឥតឈប់ឈរ។ អ្នកជំនាញខាងបុរាណវត្ថុនៃប្រទេសចិនបានរស់នៅប្រទេសកម្ពុជាជាយូរឆ្នាំដើម្បីការពារ និងជួសជុលប្រាសាទបុរាណ ដូចជាប្រាសាទចៅសាយទេវតា និងប្រាសាទតាកែវជាដើម។ អ្នកជំនាញខាងវេជ្ជសាស្ត្រប្រទេសចិន បានទៅកម្ពុជាដើម្បីជួយព្យាបាលរោគឲ្យប្រជាជនដោយឥតគិតថ្លៃ បានធ្វើការវះកាត់ខាងជំងឺភ្នែកឡើងបាយ ជូនប្រជាជនកម្ពុជាជាងមួយពាន់នាក់។ អ្នកជំនាញខាងបច្ចេកទេសកសិកម្មប្រទេសចិន បានធ្វើដំណើរទៅកាន់ទីជនបទនៃប្រទេសកម្ពុជា ពួកគេជួយបង្រៀនបច្ចេកទេសកសិកម្មនៅពេលថ្ងៃ និងជួយបង្រៀនភាសាចិននៅពេលយប់ ទទួលបានការស្វាគមន៍និងនិយមចូលចិត្តពីប្រជាជនកម្ពុជា។ វិទ្យាស្ថានខុងជឺ ដែលបានបង្កើតឡើងនៅឆ្នាំ២០០៩ នៅប្រទេសកម្ពុជា បានវិវឌ្ឍន៍ពីទីតាំងបង្រៀនតែមួយកន្លែងទៅដល់ ១៤កន្លែង សិស្ស-និស្សិតដែលកំពុងរៀនមានចំនួនលើសពី ១ម៉ឺននាក់។ គិតរហូតដល់ឆ្នាំ២០១៥ រដ្ឋាភិបាលចិនបានផ្តល់អាហារូបករណ៍ដល់សិស្សនិស្សិតកម្ពុជា ឲ្យមកបន្តវិជ្ជានៅប្រទេសចិនមានចំនួនលើសពី ១,០០០នាក់។

បច្ចុប្បន្ននេះ ប្រទេសចិន និងកម្ពុជាសុទ្ធតែស្ថិតក្នុងដំណាក់កាលអភិវឌ្ឍជាគន្លឹះ បានប្រឈមនឹងភារកិច្ចដូចគ្នាដូចជាធ្វើឲ្យកំណែទម្រង់កាន់តែស៊ីជម្រៅដោយគ្រប់ជ្រុងជ្រោយ ពង្រីកការបើកចំហចំពោះក្រៅប្រទេសនិងកែលំអរចនាសម្ព័ន្ធឧស្សាហកម្ម ចិន និងកម្ពុជាសុទ្ធតែជាអ្នកជំរុញនិងអ្នកកសាង នៃសមាហរណកម្មសេដ្ឋកិច្ចតំបន់និងកិច្ចសហប្រតិបត្តិការតំបន់។ ឈរលើចំណុចចាប់ផ្តើមថ្មីនៃទំនាក់ទំនងរវាងចិននិងកម្ពុជា ប្រទេសចិននឹងរួមជាមួយប្រទេសកម្ពុជា ធ្វើការខិតខំប្រឹងប្រែង ដើម្បីជំរុញទំនាក់ទំនងភាពជាដៃគូសហប្រតិបត្តិការជាយុទ្ធសាស្ត្រគ្រប់ជ្រុងជ្រោយ រវាងប្រទេសទាំងពីរឲ្យសម្រេចបានការអភិវឌ្ឍដោយគ្រប់ស្រទាប់ ច្រើនវិស័យនិងស៊ីជម្រៅ ដើម្បីផ្តល់សុខសុភមង្គលកាន់តែល្អប្រសើរដល់ប្រជាជននៃប្រទេសទាំងពីរ។

ប្រកាន់ខ្ជាប់ជានិច្ចនូវការកសាងទំនុកចិត្តលើគ្នាផ្នែកនយោបាយឲ្យកាន់តែស៊ីជម្រៅ។ ភាគីចិនរីករាយក្នុងការរក្សានិន្នាការបំពេញទស្សនកិច្ចជាន់ខ្ពស់ទៅវិញទៅមកជាមួយភាគីកម្ពុជា បង្កើនការប្រាស្រ័យទាក់ទងជាយុទ្ធសាស្ត្រ សង្ឃឹមថារដ្ឋាភិបាល គណបក្ស ស្ថាប័ននីតិប្បញ្ញត្តិ ខេត្តនិងទីក្រុងនៃប្រទេសទាំងពីរអាចបង្កើនការប្រាស្រ័យទាក់ទងគ្នា។ ប្រទេសចិននឹងបន្តគាំទ្រប្រទេសកម្ពុជាក្នុងការដើរតាមផ្លូវអភិវឌ្ឍ ដែលសមស្របនឹងស្ថានភាពប្រទេសខ្លួនដូចពេលមុនៗទៀត គាំទ្រយ៉ាងម៉ឺងម៉ាត់មិនងាករេដល់កម្ពុជា ក្នុងការគាំពារអធិបតេយ្យភាពជាតិ រក្សាស្ថិរភាពក្នុងប្រទេស និងពន្លឿនការអភិវឌ្ឍសេដ្ឋកិច្ច។

ជំរុញកិច្ចសហប្រតិបត្តិការដែលផ្តល់ផលប្រយោជន៍ដល់គ្នាទៅវិញទៅមកឲ្យកាន់តែស៊ីជម្រៅ។ ភាគីចិនរីករាយក្នុងការបង្កើនការតភ្ជាប់ខាងយុទ្ធសាស្ត្រអភិវឌ្ឍជាមួយភាគីកម្ពុជា ដើម្បីបង្កើតជាគំរូនៃកិច្ចសហប្រតិបត្តិការស្តីពីយុទ្ធសាស្ត្រខ្សែក្រវាត់មួយនិងផ្លូវមួយ ធ្វើឲ្យស៊ីជម្រៅនូវកិច្ចសហប្រតិបត្តិការផ្នែកផលិតភាពទៅតាមសភាពជាក់ស្តែង ជំរុញកិច្ចសហប្រតិបត្តិការលើវិស័យកសិកម្ម ធារាសាស្ត្រ ហេដ្ឋារចនាសម្ព័ន្ធ ព័ត៌មាន និងទូរគមនាគមន៍ជាដើមឲ្យទទួលបានសមិទ្ធផលជាក់ស្តែង។ ភាគីចិនរីករាយក្នុងការចាត់វិធានការដើម្បីពង្រីកការនាំចូលពីប្រទេសកម្ពុជា ក្នុងន័យពង្រីកទំហំពាណិជ្ជកម្មទ្វេភាគី។

បង្កើនការសម្របសម្រួលនិងកិច្ចសហប្រតិបត្តិការអន្តរជាតិយ៉ាងម៉ឺងម៉ាត់មិនងាករេ។ ប្រទេសចិនគាំទ្រប្រទេសកម្ពុជាឲ្យដើរតួនាទីដ៏សំខាន់ ក្នុងកិច្ចការតំបន់ក្នុងឋានៈជាសមាជិកសំខាន់នៃសមាគមអាស៊ាន រីករាយរួមជាមួយភាគីកម្ពុជា បង្កើនការសម្របសម្រួលនិងការសហការគ្នាលើឆាកតំបន់ និងពហុភាគីដូចជាកិច្ចសហប្រតិបត្តិការអាស៊ីបូព៌ា កិច្ចសហប្រតិបត្តិការទន្លេឡានឆាំង-ទន្លេមេគង្គ និងអង្គការសហប្រជាជាតិជាដើម គាំពារផលប្រយោជន៍រួមនៃប្រទេសទាំងពីរនិងប្រទេសកំពុងអភិវឌ្ឍន៍ ខ្នះខ្នែងក្នុងការបង្កើតសហគមន៍រួមវាសនាតែមួយរបស់អាស៊ី។ កិច្ចសហប្រតិបត្តិការអាស៊ីបូព៌ាកំពុងស្ថិតក្នុងដំណាក់កាលអភិវឌ្ឍន៍ជាគន្លឹះ យើងគួរតែបន្តផ្តោតសំខាន់ទៅលើប្រធានបទស្តីពីការអភិវឌ្ឍ ហើយជំរុញកិច្ចសហប្រតិបត្តិការអាស៊ីបូព៌ា ឲ្យរីកចម្រើនទៅមុខដោយបរិសុទ្ធ និងនឹងនរ។

ជំរុញការផ្សារភ្ជាប់ដួងចិត្តប្រជាជនជាសន្សឹមៗ។ ភាគីចិនរីករាយរួមសហការជាមួយភាគីកម្ពុជា ប្រើប្រាស់វេទិកាដូចជាវិទ្យាស្ថានខុងជឺ និងផ្ទះវប្បធម៌ចិនជាដើម ដើម្បីបង្កើនកិច្ចសហប្រតិបត្តិការខាងវិស័យអប់រំ វប្បធម៌ ទេសចរណ៍និងសុខាភិបាលជាដើម បង្កើនការស្វែងយល់គ្នា និងមនោសញ្ចេតនាមេត្រីភាពរបស់ប្រជាជននៃប្រទេសទាំងពីរ ជាពិសេសគឺយុវជនប្រទេសទាំងពីរ ធ្វើឲ្យចំណងមេត្រីភាពរវាងចិននិងកម្ពុជាបន្តទៅគ្រប់ជំនាន់។

ខ្ញុំជឿជាក់យ៉ាងមុតមាំថា នៅក្រោមការខិតខំប្រឹងប្រែងរួមរបស់យើង ចំណងមិត្តភាពជាប្រពៃណីរវាងចិន និងកម្ពុជា ប្រាកដជាអាចទទួលបានផ្លែផ្កាថ្មី យើងនឹងធ្វើជាអ្នកជិតខាងល្អ និងមិត្តភកិ្តពិតប្រាកដដែលមានភាពស្មោះត្រង់ នឹងគ្នាជារៀងរហូត៕