ភ្នំពេញ: បុគ្គលិកបម្រើការនៅក្នុងរោងចក្រស្លដែកដ៏ធំមួយកន្លែងក្នុងសង្កាត់ស្ទឹងមានជ័យ បានសម្រេចចិត្តយកក្រមាចងករភ្ជាប់ទៅនឹងសសររោងស្នាក់នៅរបស់ខ្លួនធ្វើអត្តឃាតសម្លាប់ខ្លួនឯង ទំនងជាតូចចិត្តនឹងក្រុមសន្តិសុខចាក់សោរបិទទ្វាររបងមិនឲ្យខ្លួនចេញទៅខាងក្រៅកាលពីល្ងាច បង្កឲ្យមានការភ្ញាក់ផ្អើលកាលពីវេលាម៉ោង៥និង៣០នាទី ព្រឹកថ្ងៃទី ១៨ ខែតុលា ឆ្នាំ២០១៦ ស្ថិតនៅចំណុចឃ្លាំងដែកគ្មានលេខ ផ្លូវលេខ៣៧១ ក្រុមទី៤ ភូមិឬស្សី១ ក្នុងសង្កាត់ស្ទឹងមានជ័យ ខណ្ឌមានជ័យ។
យោងតាមប្រភពព័ត៌មានពីកម្លាំងគរបាលបានប្រាប់ឲ្យដឹងថា បុរសរងគ្រោះមានឈ្មោះ សោម ណាង អាយុ ៣១ឆ្នាំ ជាបុគ្គលិកបម្រើការនិងស្នាក់នៅក្នុងរោងចក្រស្លដែកខាងលើ មានប្រពន្ធនិងកូនម្នាក់មានស្រុកកំណើតនៅភូមិព្រែកក្របៅ ឃុំព្រែកក្របៅ ស្រុកពាមជរ៍ ខេត្តព្រៃវែង។

មុនពេលកើតហេតុ កាលពីវេលាម៉ោងជិត៦ល្ងាចថ្ងៃទី១៧ ខែតុលា ល្ងាចមិញ គេបានឃើញបុរសរងគ្រោះរៀបចំខ្លួនដោយមុជទឹក និងស្លៀកពាក់ខោអាវ យ៉ាងស្អាតបាតទំនងជាមានបំណងចេញទៅខាងក្រៅដោយមិនមានអ្នកណាម្នាក់ដឹងថារូបគេចង់ទៅណាឡើយ។ ខណ:នោះជនរងគ្រោះក៏បានដើរទៅសុំក្រុមសន្តិសុខចេញតែមិនត្រូវបានក្រុមសន្តិសុខនោះបើកទ្វារឲ្យចេញឡើយ ហើយក៏បានដើចូលទៅកន្លែងស្នាក់នៅរបស់ខ្លួនវិញ។ លុះដល់ព្រឹកឡើងក៏ត្រូវបានក្រុមបុគ្គលិកដែលធ្វើការជាមួយគ្នាបានប្រទះឃើញ បុរសរូបនោះបានយកក្រមាចងករភ្ជាប់ទៅនឹងបង្គោលរោងស្នាក់នៅធ្វើអត្តឃាតសម្លាប់ខ្លួនឯងស្លាប់បាត់ទៅហើយទំនងជាតូចចិត្តដោយសាតតែរឿងនេះ និងបង្កឲ្យមានការភ្ញាក់ផ្អើលកើតឡើង និងរាយការណ៍ប្រាប់កម្លាំងមានសម្ថកិច្ចមូលដ្ឋានតែម្តង។

ប៉ុន្តែនៅក្នុងករណីមនុស្សចងករនេះដែរ ម្ចាស់ទីតាំងស្លដែកខាងលើហាក់បីដូចជាមានការលាក់លៀមអំពីព័ត៌មាននេះយ៉ាងខ្លាំង ដោយមិនអនុញ្ញាតិឲ្យក្រុមអ្នកយកព័ត៌មានចូលទៅខាងក្នុងបរិវេណខាងលើដើម្បីថតនិងផ្តិតយករូបភាពនេះបានឡើយ។

ក្រោយពេលកើតហេតុកម្លាំងមានសម្ថកិច្ចមូលដ្ឋាន និងជំនាញក៏បានចុះមកធ្វើការត្រួតពិនិត្យកន្លែងកើតហេតុ និងកោសលវិច្ច័យទៅលើសពរបស់បុរសរងគ្រោះបានឃើញថា រូបគេពិតជាបានស្លាប់ដោយសារតែការចងករធ្វើអត្តឃាតសម្លាប់ខ្លួនឯងប្រាកដមែន ទើបប្រគល់សាកសពទៅឲ្យក្រុមគ្រួសារយកទៅធ្វើបុណ្យតាមប្រពៃណីនៅឯស្រុកកំណើត៕