ភ្នំពេញៈ នៅទីបំផុតខ្សែរឿង«កោះពេជ្រ»ដែលត្រូវបានប្រកាសថាឈ្នះពានអន្តរជាតិជាភាពយន្តមានគុណភាពល្អត្រូវបានបើកសម្ពោធដាក់បញ្ចាំងជាផ្លូវការហើយកាលពីយប់ថ្ងៃទី២៦តុលា នៅរោងកុន Legend ផ្សារទំនើបទួលគោក។ ខ្សែរឿងនេះក៏ត្រូវបានបញ្ជាក់ថាចូលរួមសម្ដែងពីតារាៗមិនមែនអាជីពដែលជ្រើសចេញពីតាមថ្នល់ផងដែរ ដើម្បីឲ្យការសម្ដែងរបស់ពួកគេមានភាពរស់រវើកដោយមិនចាំបាច់ហ្វឹកហាត់។ ជាក់ស្ដែងតួអង្គឯកប្រុសគឺជាអ្នកចាប់ម៉ូយតាមរថយន្ត និងធ្លាប់បម្រើការជាកម្មករនាពេលអតីតកាលប៉ុណ្ណោះ ទើបលោកអាចសម្ដែងជាតួអង្គកម្មករសំណង់ និងជាក្មេងដែលមានការតស៊ូបានល្អ។

លោកជូ ដេវី ផលិតកររឿង«កោះពេជ្រ»បានអះអាងថានេះជារឿងដែលនិយាយពីការជួបជុំរបស់បងប្អូនប្រុស២នាក់ បន្ទាប់ពីពួកគេមានឱកាសចាកចេញពីស្រុកហើយមកធ្វើការនៅកោះពេជ្រ។ រឿងនេះលោកថាបានថតកាលពីខែ១២ក្នុងឆ្នាំ២០១៥ និងបានយកទៅប្រកួតក្នុងមហោស្រពភាពយន្ត«កាន»នៅប្រទេសបារាំងកាលពីខែ៥ក្នុងឆ្នាំ២០១៦ ដោយទទួលបានពានជាភាពយន្តល្អ និងរស់រវើកក្នុងចំណោមភាពយន្តរាប់រយមកពីគ្រប់ទិសទីដែលបានបង្ហាញខ្លួន។ លោកថាគឺជាមោទនភាពធំមួយដែលភាពយន្តខ្មែរត្រូវបានទទួលស្គាល់គុណភាពដោយគណកម្មការវាយតម្លៃភាពយន្តនៅក្រៅប្រទេស។ យ៉ាងណាក៏ដោយលោកនៅមិនទាន់ដឹងថាខ្សែរឿងមួយនេះនឹងទទួលបានការគាំទ្រខ្ពស់ក្នុងពេលដាក់បញ្ចាំងនៅកម្ពុជានៅឡើយទេ។

នៅក្នុងពិធីបើកសម្ពោធរឿង«កោះពេជ្រ»នោះ បើទោះមិនមានតារាសម្ដែងល្បីៗចូលរួមជាភ្ញៀវកិត្តិយស ក៏មានវត្តមានរដ្ឋមន្ត្រី២រូបមកពីក្រសួងព័ត៌មាន និងក្រសួងវប្បធម៌។ ក្នុងនោះក៏មានវត្តមានផលិតករកុនមួយចំនួនចូលរួមផងដែរ៕