ភ្នំពេញ: បុរស២នាក់ ត្រូវបានកម្លាំងនគរបាលខណ្ឌច្បារអំពៅ ធ្វើការចាប់ឃាត់ខ្លួន បន្ទាប់ពីម្នាក់ៗប្រដាប់ដោយដាវស៊ាំម៉ូរ៉ៃ និងខ្សែក្រវ៉ាត់ ដេញកាប់និងវាយគ្នាទៅវិញទៅមក រឿងជំពាក់ប្រាក់ចំនួន៤០ម៉ឺនរៀល បង្កឲ្យមានការភ្ញាក់ផ្អើលកាលពីវេលាម៉ោង ៩ និង ៣០នាទីព្រឹក ថ្ងៃទី១៦ ខែវិច្ឆិកា ឆ្នាំ២០១៦ នៅក្នុងសាលាបឋមសិក្សាច្បារអំពៅ សង្កាត់ច្បារអំពៅទី១ ខណ្ឌច្បារអំពៅ រាជធានីភ្នំពេញ។

យោងតាមប្រភពព័ត៌មានពីនគរបាលបានប្រាប់ឱ្យដឹងថា បុរសទាំងពីរនាក់ ទី១ឈ្មោះ ប៊ុន ហុង អាយុ៣១ឆ្នាំ ជាតិវៀតណាម មុខរបរកម្មករសែង ទំនិញ (ជាម្ចាស់លុយ) ស្នាក់នៅផ្ទះជួលក្នុងភូមិដើមអំពិល សង្កាត់ច្បារអំពៅទី១ ខណ្ឌច្បារអំពៅ និងទី២ឈ្មោះ ប្រុស សុធា អាយុ២៣ឆ្នាំ កូនសិស្សលោកវត្តច្បារអំពៅ (ជាកូនបំណុល) មានទីលំនៅក្នុងភូមិកណ្តាល សង្កាត់ច្បារអំពៅទី២ ខណ្ឌច្បារអំពៅ។

ប្រភពដដែលបានបន្តថា កាលពីពេលកន្លងមកនេះបុរសឈ្មោះ ប្រុស សុធា បានខ្ចីលុយពីឈ្មោះ ប៊ុន ហុង ចំនួន៤០ម៉ឺនរៀល ដោយបានសងវិញចំនួន២៥ម៉ឺនរៀលមកហើយ និងនៅខ្វះប្រាក់ចំនួន១៥ម៉ឺនរៀលទៀត ហើយប្រពន្ធរបស់បុរសជាម្ចាស់បំណុលក៏បានទៅទារចំនួន៥ទៅ៦លើក តែបុរសរូបនោះមិនមានលុយសងនោះទេ។ លុះមកដល់ព្រឹកថ្ងៃកើតហេតុនេះ បុរសជាប្តីឈ្មោះប៊ុន ហុង ក៏បានទៅទារម្តង តែបុរសជាកូនបំណុលនៅតែមិនមានលុយសងក៏វាយចំនួនពីរដៃទៅលើបុរសឈ្មោះ ប្រុស សុធា រូបនោះ ជាហេតុធ្វើឲ្យបុរសរូបនោះខឹងក៏ទាញខ្សែរក្រវ៉ាត់ពីចង្កេះខោបម្រុងវាយតបតវិញ ក៏ស្រាប់តែបុរសរូបនោះរត់ទៅផ្ទះយកដាវស៊ាំម៉ូរ៉ៃមកដេញកាប់វិញធ្វើឲ្យមានការភ្ញាក់ផ្អើលកើតឡើង ហើយក៏ត្រូវកម្លាំងមានសម្ថកិច្ចចុះទៅធ្វើការឃាត់ខ្លួនទាំងពីរនាក់តែម្តង។

ក្រោយពេលកើតហេតុ បុរសទាំងពីរនាក់រួមទាំងដាវស៊ាំម៉ូរ៉ៃចំនួនមួយដើម និងខ្សែរក្រវ៉ាត់ចំនួនមួយ ជាវត្ថុតាងត្រូវបានធ្វើការឃាត់ខ្លួនយកមកធ្វើការសាកសួរ និងកំណត់ហេតុនៅអធិការដ្ឋាននគរបាលខណ្ឌច្បារអំពៅ ដើម្បីចាត់ការទៅតាមផ្លូវច្បាប់ជាបន្តទៅទៀត៕