ភ្នំពេញ: បុរសម្នាក់ ហេតុតែស្រឡាញ់នារីម៉ាស្សាដល់ឆ្អឹងស្ទើរលេប បានប្រាប់ឲ្យនាងឈប់ប្រកបរបរម៉ាស្សា ដោយខ្លួនធានាចិញ្ចឹម ប៉ុន្តែដោយសារតែខាងស្រីមិនព្រមទៅ បានធ្វើឲ្យបុរសស្មោះស្នេហ៍រូបនេះខឹង ក៏បានទិញសាំង ០៣លីត្រ បំណងប្រុងមកដុតនាងទាំងរស់ និងដុតខ្លួនឯងតាមក្រោយ ប៉ុន្តែការប៉ងនេះ មិនបានសម្រេចឡើយ ត្រឹមខូចខាតសម្ភារ:ក្នុងផ្ទះម៉ាស្សាតែប៉ុណ្ណោះ។

ហេតុការណ៍នេះ បានបង្កការភ្ញាក់ផ្អើលនៅវេលាម៉ោង ៧ និង៥០នាទីយប់ ថ្ងៃទី១៨ ខែវិច្ឆិកា ឆ្នាំ២០១៦នេះ នៅចំនុចផ្ទះម៉ាស្សាយីហោការ៉េប្រាំបួន ៩៩៩៩ ផ្ទះលេខ៣៧៥ ផ្លូវលេខ ២០០៤ ភូមិត្រពាំងល្វា សង្កាត់កាកាបខណ្ឌពោធិសែនជ័យ រាជធានីភ្នំពេញ។
កម្លាំងអាវុធហត្ថខណ្ឌ បានឃាត់ខ្លួនជនសង្ស័យម្នាក់ ក្នុងបទល្មើសជាក់ស្តែង ពីបទប៉ុនប៉ងដុតផ្ទះអ្នកដ៏ទៃមិនបានសម្រេច បណ្តាលឲ្យរបួសមនុស្សពីរនាក់ និងខូចខាតសម្ភារ:ក្នុងផ្ទះបន្តិចបន្តួច។

ជនរងគ្រោះទី១ ឈ្មោះ អ៉ឹម ណាវី ភេទស្រីអាយុ៣៥ឆ្នាំ ស្នាក់នៅកន្លែងកើតហេតុ និងជាម្ចាស់ហាងម៉ាស្សាខាងលើ ទី២ឈ្មោះ ឈិន ស្រីមុំ ភេទស្រី អាយុ៣៣ឆ្នាំ មុខរបរម៉ាស្សា ស្នាក់នៅកន្លែងកើតហេតុខាងលើ។ ចំណែកជនសង្ស័យឈ្មោះអៀម រដ្ឋា ភេទប្រុស អាយុ២៤ឆ្នាំ មុខរបររត់កង់បី ស្រុកកំណើតភូមិត្នោតស្វាយ ឃុំរោងដំរី ស្រុកបាភ្នំ ខេត្តព្រៃវែង បច្ចុប្បន្នស្នាក់នៅបន្ទប់ជួលភូមិត្រពាំងថ្លឹងសង្កាត់ចោមចៅខណ្ឌពោធិសែនជ័យ។
បើតាមសមត្ថកិច្ចបានឲ្យដឹងថា ជនសង្ស័យបានស្រលាញ់នារីម្នាក់ឈ្មោះ ជា ស្រីមុំ ភេទស្រី អាយុ២៥ឆ្នាំ មុខរបរម៉ាស្សានៅកន្លែងកើតហេតុរយ:ពេលជាងពីរខែកន្លងមកហើយ ហើយជនសង្ស័យតែងនារីរូបនោះ ឲ្យឈប់ធ្វើនារីម៉ាស្សាហើយមករស់នៅជាមួយខ្លួន ប៉ុន្តែនាងមិនព្រមដោយសារមិនស្គាល់សាវតាជនសង្ស័យច្បាស់។

លុះដល់ថ្ងៃកើតហេតុជនសង្ស័យបានមករកឈ្មោះជាស្រីមុំនៅកន្លែងម៉ាស្សាហើយមានកាន់ថង់មួយដាក់ដបសាំងប្រហែល៣លីត្រ និងកាន់ដែកកេះមួយក្នុងដៃ ពេលឃើញដូច្នេះឈ្មោះជាស្រីមុំ បានរត់ចូលក្នុង ហើយជនសង្ស័យបានដេញតាមនិងចាក់សាំងដុតក្នុងផ្ទះតែម្តង ប៉ុន្តែត្រូវបានម្ចាស់ផ្ទះពន្លត់ទាន់ពេល។

ក្រោយពេលបង្កហេតុ ជនសង្ស័យត្រូវបានកម្លាំងល្បាតអាវុធហត្ថខណ្ឌពោធិ៍សែនជ័យឃាត់ខ្លួនបានភ្លាមៗតែម្តង។ ក្រោយការសាកសួរជនសង្ស័យបានសារភាពថា ខ្លួនបានទិញសាំងចំនួន៣លីត្របំណងមកដុតឈ្មោះជាស្រីមុំ និងដុតខ្លួនឯងឲ្យស្លាប់ទាំងពីរនាក់ដោយសារតែខឹងនឹងឈ្មោះជាស្រីមុំមិនព្រមរស់នៅជាមួយខ្លួន ប៉ុន្តែដោយឈ្មោះជាស្រីមុំដឹងខ្លួនមុនហើយរត់ចូលក្នុងទើបខ្លួនចាក់សាំងដុតក្នុងផ្ទះតែម្តង។

ជាមួយគ្នានោះដែរ សមត្ថកិច្ចបានរកឃើញវត្ថតាងមាន ដែកកេះចំនួនមួយ(ខូចដោយសារតែឆេះ) ហើយជនសង្ស័យបានសារភាពថាជារបស់ខ្លួនដែលបានយកមកដុតពិតមែន៕