ភ្នំពេញ: គ្រោះថ្នាក់ចរាចរណ៍មួយបានកើតឡើង បង្កដោយរថយន្តដឹកដីប្រភេទបែន បានបើកលឿនពេក ជាន់ហ្វ្រាំងមិនស៊ី ក៏ជ្រុលទៅបុករថយន្តកុងតឺន័រនៅពីមុខ រួចហើយរុញរថយន្តកុងតឺន័រនោះ ទៅមុខបុកនឹងរថយន្តម៉ាក CRV មួយគ្រឿងទៀត បណ្តាលឲ្យខូចខាតច្រើនគួរសម។

ហេតុការណ៍គ្រោះថ្នាក់ចរាចរណ៍ដោយសារល្មើសល្បឿននេះ បានកើតឡើងកាលពីវេលាម៉ោង ៩ និង៣០នាទីយប់ ថ្ងៃទី១៨ ខែវិច្ឆិកា ឆ្នាំ២០១៦ នៅចំណុចផ្លូវលេខ ៥៩៨ ស្ថិតក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។

ប្រភពពីកន្លែងកើតហេតុបានឲ្យដឹងថា មុនពេលកើតហេតុ គេឃើញរថយន្តមួយគ្រឿងម៉ាកហ៊ីណូ ប្រភេទបែន ក្បាលពណ៌បៃតង ពាក់ស្លាកលេខ ពោធិ៍សាត់ 3A-0201 ដឹកគ្រួសពេញលើរថយន្ត បើកដោយបុរសម្នាក់ក្នុងទិសដៅពីជើងទៅត្បូងក្នុងល្បឿនលឿន លុះមកដល់ចំណុចកើតហេតុ ដោយសារតែរថយន្តខាងលើមានបញ្ហាហ្វ្រាំងចាប់មិនស៊ី ទើបបណ្ដាលឲ្យរថយន្តបង្កខាងលើបើកជ្រុលទៅកៀរថយន្តកុងតឺន័រមួយគ្រឿង ពាក់ស្លាកលេខ ភ្នំពេញ 3D- 4630 កំពុងតែឈប់រង់ចាំស្តុបបណ្ដាលឲ្យខូចខាតទ្វាខាងស្ដាំហើយភ្លាមនោះរថយន្តមិនទាន់អស់ល្បឿននៅឡើយក៏បន្តទៅបុករថយន្តមួយគ្រឿងទៀតដែលកំពុងឈប់រង់ចាំស្តុបដូចគ្នា ម៉ាក CRV ពណ៌ទឹកប្រាក់ ពាក់ស្លាកលេខ ភ្នំពេញ 2C- 0178 ដែលមានអ្នកជិះនៅក្នុងរថយន្តចំនួន៤នាក់ បណ្ដាលឲ្យរងការខូចខាតផ្នែងខាងក្រោយ តែសំណាងល្អមិនមានអ្នករងរបួសអ្វីនោះទេ។

បើតាមសម្ដីរបស់អ្នកបើកបររថយន្តបង្កដែលមានឈ្មោះ ហ៊ន ខ្នា ភេទប្រុស អាយុ២៥ឆ្នាំ មុខរបរអ្នកបើកបររថយន្ត មានស្រុកកំណើតនៅក្រុងសៀមរាប ខេត្តសៀមរាប បានប្រាប់ឲ្យដឹងថាមុ នពេលកើតហេតុរូបគាត់បានបើករថយន្តខាងលើដឹកគ្រួស ពីខេត្តកំពង់ឆ្នាំ ងយកទៅដាក់នៅឯច្បារអំពៅ ហើយដោយសារតែរថយន្តរបស់គាត់ មានបញ្ហាហ្វ្រាំងចាប់ម្ដងស៊ី ម្ដងមិនស៊ី ហើយពេលមកតាមផ្លូវគឺគាត់ចាប់ស៊ីធម្មតា តែស្រាប់តែមកដល់ចំណុចកើតហេតុដោយសារតែរថយន្តរបស់គាត់ចាប់ហ្វ្រាំងមិនស៊ីក៏គាត់បង្ខំចិត្តបើករថយន្តទៅកៀរថយន្តកុងទែនឺដែលនៅខាងមុខគាត់ដើម្បីឲ្យល្បឿនរថយន្តអន់ថយបន្តិច ហើយភ្លាមនោះរថយន្តមិនទាន់ឈប់វិលកង់ក៍បានជ្រុលទៅបុករថយន្ត CRV ដែលអ្នករួមដំណើរក្នុងនោះទើបតែចេញមកពីហូបការ តែសំណាងល្អដែលអ្នកនៅក្នុងរថយន្តនោះមិនមានរងរបួសសូម្បីតែម្នាក់។

ក្រោយកើតហេតុ សមត្ថកិច្ចចរាចរណ៍នៃស្នងការដ្ឋាននគរបាលរាជធានីភ្នំពេញ បានធ្វើការវាស់វែង នាំយករថយន្តទាំង៣គ្រឿង យកទៅរក្សាទុក ដើម្បីដោះស្រាយតាមនីតិវិធីច្បាប់ផងដែរ៕