ស្វាយរៀង: ទោះបីទីផ្សារស្រូវ អង្ករ មានការចុះថ្លៃបន្តិចក្តី រហូតមកដល់ចុងខែវិច្ឆិកា ឆ្នាំនេះ កសិករនៅទូទាំងខេត្តស្វាយរៀង ចុះធ្វើស្រែប្រដេញទឹក និងស្រែប្រាំងបានជាង១០ភាគរយនៃផែនការផលិតស្រូវប្រចាំឆ្នាំ។
នៅថ្ងៃទី២១ ខែវិច្ឆិកានេះ លោក ថាច់ រតនា ប្រធានមន្ទីរកសិកម្ម ខេត្តស្វាយរៀងបានឲ្យដឹងថា បន្ទាប់ពីជំនន់ទឹកភ្លៀង និងជំនន់ទឹកទន្លេស្រកចុះបន្តិច កសិករដែលមានដីទំនាបនៅក្នុងស្រុកកំពង់រោទិ៍ ចន្ទ្រា ស្វាយជ្រំ និងក្រុងស្វាយរៀង រហូតមកដល់ពេលនេះ សម្រេចធ្វើស្រែប្រដេញទឹក និងស្រែប្រាំង ជាង២ពាន់ហិកតាហើយ លើផែននៃការផលិតស្រូវប្រចាំឆ្នាំជាង២ម៉ឺនហិកតា ។
លោក បន្តថា ស្រុកដែលផលិតស្រូវប្រដេញទឹក និងស្រែប្រាំងបានច្រើនជាងគេ គឺស្រុកចន្ទ្រា និងស្រុកកំពង់រោទិ៍ ឯស្រុកមួយចំនួនទៀត នៅមានភាពយឺតយ៉ាវនៅឡើយ ដោយសារទឹកទន្លេ និងទឹកភ្លៀងនៅបន្តជន់ មិនទាន់អាចផលិតស្រូវបាន។ ទន្ទឹមនឹងការងារធ្វើស្រែប្រាំង និងស្រូវប្រដេញទឹក នៅចុងខែវិច្ឆិកានេះ កសិករនៅទូទាំងខេត្ត បានធ្វើការប្រមូលផលស្រូវស្រាល និង ស្រូវកណ្តាល បានជាង៦ពាន់ហិកតា ដោយទទួលបានទិន្នផលពី៣ទៅជិត៤តោនក្នុងមួយហិកតា។
លោក ក៏បានបញ្ជាក់ថា នៅរដូវវស្សាឆ្នាំ២០១៦នេះ កសិករខេត្តស្វាយរៀង ទោះជួបនឹងគ្រោះរាំងស្ងួតនៅពាក់កណ្តាលរដូវ ក្នុងឃុំមួយចំនួនរបស់ស្រុករមាសហែក ស្រុករំដួល ជំនន់ទឹកភ្លៀង រួមនឹងទឹកទន្លេបន្តិចក្តី ក៏កសិករនៅតែបន្តសម្រេចផលិតស្រូវគ្រប់ប្រភេទ សម្រាប់បម្រើជីវភាពគ្រួសារ និងបម្រើការនាំផលិតផលអង្ករទៅកាន់ទីផ្សារអន្តរជាតិ បានលើសផែនការផលិតស្រូវប្រចាំឆ្នាំ១៦ម៉ឺន៥ពាន់ហិកតាដែរ៕
មតិយោបល់