កំពង់ឆ្នាំងៈ នៅថ្ងៃទី១៥ ខែកញ្ញា ឆ្នាំ២០២០ វេលាម៉ោង ១១និង៣៥នាទីព្រឹក មានករណីបុរសអ្នករត់ផាស្អាប់ ២នាក់ ត្រូវស្រ្តី ២នាក់ ឆបោកដាក់ថ្នាំងងុយដេក ក្នុងហាងលក់គ្រឿងក្លែម យីហោចំណូលថ្មី ចំណុចមុខផ្សារទើបសង់ថ្មី ចុងកោះ ស្ថិតក្នុងភូមិទី៧ សង្កាត់ខ្សាម ក្រុងកំពង់ឆ្នាំង។
បុរសរងគ្រោះទាំង ២នាក់ មិនត្រូវបានស្គាល់ឈ្មោះទេ មានមុខរបរជាអ្នករត់ផាស្អាប់។

ដំណើររឿង៖ មុនពេលកើតហេតុជនរងគ្រោះទាំង ២នាក់ បានធ្លាក់ក្នុងអន្លង់ស្នេហ៍ស្រីស្អាត ២រូប ហើយក៏ចរចាផ្អែមល្ហែមអូនបងមិនដាច់ពីមាត់ រួចបុរសទាំង ២នាក់ ក៏បានបបួលនាងៗ ទៅផឹកស៊ីបង្កើនស្នេហ៍ឲ្យកាន់តែស្អិតរមួតបន្ថែម នៅត្រង់ចំណុចទីតាំងកើតហេតុខាងលើ ផឹកស្រាបៀរអស់ច្រើនកំប៉ុង មើលមុខអូនៗកាន់តែស្រស់ស្អាតថែមឡើងមួយកម្រិតទៀត រហូតនាងៗ ដាក់សណ្ដំក្នុងកែវស្រាសន្លប់បាត់ស្មារតី រួចដោះចិញ្ជៀនមួយវង់ មានទម្ងន់ ៥ជី និងប្រាក់ ៤០ម៉ឺនរៀល ចែកជើងគ្នារត់បាត់ស្រមោលតែម្ដង។ លុះងងឹតស្រាងៗម៉ោងប្រហែល ៦ល្ងាច ទើបដឹងខ្លួនម្នាក់ ប៉ុន្តែសួរនាំចេះតែគ្រវីក្បាល ដូចត្រូវច្រាំងទិច និងម្នាក់ទៀតដេកលង់លក់ដូចខ្មោចងាប់ ឃើញដូច្នោះ ម្ចាស់ហាងក៏រាយការណ៍ជូនសមត្ថកិច្ច ដើម្បីចុះមកទីតាំងខាងលើ ជួយអន្តរាគមន៍៕