ភ្នំពេញៈ បុរសម្នាក់បានរត់ឡើងលើដំបូលផ្ទះគេ មិនព្រមចុះទាល់តែសោះ បង្កឲ្យមានការភ្ញាក់ផ្អើលកាលពីវេលាម៉ោង៣ និង២០នាទីទៀបភ្លឺ ថ្ងៃទី១៣ ខែមករា ឆ្នាំ២០១៧ ចំណុចភូមិត្រពាំងស្វាយ សង្កាត់ភ្នំពេញថ្មី ខណ្ឌសែនសុខ តែអ្វីដែលគួរឲ្យអស់សំណើចនោះ គ្រាន់តែប្រជាពលរដ្ឋបញ្ឆោតថា ប៉ាវបាយស្រូបស្រាប់តែព្រមចុះមកក្រោមវិញតែម្តង។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់ជិះម៉ូតូ១គ្រឿង ម៉ាក ភូហ្សា ពណ៌ក្រហម លាយខ្មៅ ពាក់ស្លាកលេខ ភ្នំពេញ 1CQ-7875 ពេលមកដល់ចំណុចកើតហេតុស្រាប់តែបុរសរូបនោះបានឈប់ម៉ូតូ រួចរត់ឡើងលើដំបូលផ្ទះ បណ្ដាលឲ្យប្រជាពលរដ្ឋនៅម្ដុំនោះ ផ្អើលឆោឡោរត់ចេញមកមើលគ្រប់គ្នា ធ្វើឲ្យបុរសដែលនៅលើដំបូលផ្ទះភ័យមិនហ៊ានចុះមកក្រោមទេ។

ប្រភពដដែលបន្តថា អស់រយៈពេលជាងមួយម៉ោង ទើបប្រជាពលរដ្ឋបាននាំគ្នាបញ្ឆោតបុរសនោះថា ចុះមកក្រោមវិញមក ពួកគាត់ប៉ាវបាយស្រូប ហើយប្រហែលជាបុរសនោះឃ្លានដែរហើយមើលទៅ ទើបព្រមចុះមកក្រោមវិញ ដើម្បីហូបបាយស្រូប។ លុះចុះមកដល់ខាងក្រោម ក៏ត្រូវប្រជាពលរដ្ឋនិងសមត្ថកិច្ច ចាប់ខ្លួនបុរសនោះ យកទៅប៉ុស្ដិ៍នគរបាលភ្នំពេញថ្មី ដើម្បីធ្វើការសាកសួរតែម្តង ។

បើតាមសមត្ថកិច្ចបានឲ្យដឹងថា បុរសដែលរត់ឡើងលើដំបូលផ្ទះគេនេះឈ្មោះ ស៊ីន សុភក្ដិ ភេទប្រុស អាយុ២៥ឆ្នាំ មុខរបរមេជាងថ្នាំបាញ់ផ្ទះ ស្នាក់នៅក្នុងការដ្ឋានម្ដុំផ្សារដីហុយ សង្កាត់ភ្នំពេញថ្មី ខណ្ខសែនសុខ មានស្រុកកំណើតនៅខេត្តកំពង់ឆ្នាំង ។

តាមសម្ដីសារភាពរបស់បុរសរូបនោះបានឲ្យដឹងថា មុនពេលកើតហេតុ ដោយសារតែមានម៉ូតូជាច្រើនគ្រឿង បានជិះដេញវ៉ៃគាត់ ហើយម៉ូតូរបស់គាត់អស់សាំង ទើបគាត់រត់ឡើងលើផ្ទះគេតាមរន្ទាធ្វើផ្ទះ ដែលគេដាក់ជិតនោះ។ លុះពេលឃើញមនុស្សច្រើនមកព័ទ្ធរូបគេនៅខាងក្រោមពេញ ធ្វើឲ្យគេភ័យមិនហ៊ានចុះមកក្រោម ។

ប៉ុន្តែបុរសខាងលើត្រូវបានគេសង្ស័យថាបែកថ្នាំ ព្រោះគេបានសារភាពថា រូបគេបានជក់គ្រឿងញៀនតាំងពីព្រឹកម្ដងរួចមកហើយ។

ក្រោយពេលសួរនាំរួច សមត្ថកិច្ចបានធ្វើការអប់រំ និងទាក់ទងទៅកាន់សាច់ញាតិឲ្យមកធានាបុរសម្នាក់នោះឲ្យត្រលប់ទៅផ្ទះវិញផងដែរ៕