ភ្នំពេញៈ កម្លាំងសមត្ថកិច្ចនគរបាលខណ្ឌឫស្សីកែវ ដឹកនាំកម្លាំងចុះបង្ក្រាបទីតាំងជួញដូរនិងចែកចាយគ្រឿងញៀនមួយកន្លែង ឃាត់ខ្លួនបានជនសង្ស័យប្រុសស្រីចំនួន៥នាក់ រួមនិងវត្ថុតាងមួយចំនួន ។

ការបង្ក្រាបនេះ ធ្វើឡើងកាលពីវេលាម៉ោង១រសៀល ថ្ងៃទី ១៣ ខែមករា ឆ្នាំ២០១៧ ស្ថិតនៅចំណុចផ្ទះជួលច្រកចូលផ្សារគីឡូម៉ែត្រលេខ៦ ខាងមុខស្ថានីយ៍ទូរទស្សន៍CTN ក្នុងភូមិក្រោលគោ សង្កាត់ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ។

សមត្ថកិច្ចបានឲ្យដឹងថា ការបង្ក្រាបនេះដែរ មានការដឹកនាំកម្លាំងដោយលោក
ទៀង ចន្ទ័សា អធិការនគរបាលខណ្ឌឫស្សីកែវ សហការជាមួយនិងនគរបាលចម្រុះទាំង៦ប៉ុស្តិ៍ រួមនិងកម្លាំងប្រជាការពារខណ្ឌឫស្សីកែវ បានឆ្មក់ចុះបង្ក្រាបទីតាំងជួញដូរ និងចែកចាយគ្រឿងញៀនមួយកន្លែង ឃាត់ខ្លួនបានជនសង្ស័យប្រុសស្រីចំនួន៥នាក់ ក្នុងនោះមានប្រុស៣នាក់ ស្រី២ នាក់ ដកហូតបានថ្នាំញៀនចំនួន៣កញ្ចប់, ដាវចំនួន១ រួមទាំងឧបរករណ៍សម្រាប់ជក់និងចែកចាយមួយចំនួនទៀត។

បច្ចុប្បន្នជនសង្ស័យទាំង៣នាក់សមត្ថកិច្ចកំពុងធ្វើការសាកសួរនៅឡើយ៕