ភ្នំពេញ: លោក មាជ សុវណ្ណារ៉ា សកម្មជនគណបក្សសង្គ្រោះជាតិ បានថ្លែងប្រាប់អ្នកសារព័ត៌មាននាព្រឹកថ្ងៃទី១៩ ខែតុលា ឆ្នាំ២០១៦នេះ ថា សំណុំរឿងរបស់លោក អាចនឹងរួចខ្លួនលុះត្រាតែមានដំណោះស្រាយនយោបាយ ព្រោះរឿងរបស់លោកជារឿងនយោបាយ។

លោក ជូង ជូងី មេធាវីការពារសិទ្ធិលោក មាជ សុវណ្ណារ៉ា បានបញ្ជាក់ប្រាប់ក្រុមអ្នកសារព័ត៌មាននៅក្រោយសវនាការថា នៅព្រឹកថ្ងៃទី១៩ ខែតុលា ឆ្នាំ២០១៦ តុលាការកំពូលបើកសវនាការលើបណ្តឹងសុំច្រានចោលសេចក្តីសម្រេច មុនអង្គសេចក្ដីរបស់តុលាការរាជធានីភ្នំពេញដែលបាន បដិសេធមិនឲ្យលោក មាជ សុវណ្ណារ៉ា បាននៅក្រៅឃុំជាបណ្តោះអាសន្ន។

គួររំលឹកថា លោក មាជ សុវណ្ណារ៉ា ធ្លាប់ត្រូវបានតុលាការនៃសាលាដំបូងរាជធានីភ្នំពេញ សម្រេចផ្តន្ទាទោសដាក់ពន្ធនាគារកំណត់រយ:ពេល ២០ឆ្នាំ កាលថ្ងៃទី២១ ខែកក្កដា ឆ្នាំ២០១៥កន្លងទៅ ក្រោមបទចោទប្រកាន់ពីបទ ចូលរួមនឹងដឹកនាំចលនាកុប្បកម្ម នៅក្បែរស្ពាននាគជិតទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤ កន្លងទៅ។

ទោះយ៉ាងណា សំណុំរឿងនេះត្រូវបានលោកស្រី គឹម សុថាវី ប្រធានក្រុមប្រឹក្សាចៅក្រមជំនុំជម្រះ លើកពេលទៅប្រកាសសាលក្រមនៅព្រឹកថ្ងៃទី១០ ខែតុលា ឆ្នាំ២០១៦ខាងមុខ៕

//youtu.be/KlXdELtWuOk