ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួងសាធារណការនិងដឹកជញ្ជូន បានចុះហត្ថលេខាលើកិច្ចសន្យាជាមួយក្រុមហ៊ុន Sichuan Road and Bridge (Group) Corporation Ltd ដើម្បីលើកកម្រិត និងថែទាំផ្លូវជាតិលេខ ៣ (ពីខេត្តកំពត ដល់វាលរេញ) និង លេខ ៧ (ពីថ្នល់ទទឹង ដល់ក្រុងក្រចេះ) គម្រោងកំណាត់ផ្លូវជាតិទាំងពីរនេះ នឹងធ្វើការលើកកម្រិតផ្លូវពីកម្រាលកៅស៊ូ DBST បច្ចុប្បន្ន ទៅជាកម្រាលកៅស៊ូ AC ហើយនិងធ្វើការស្ថាបនាលូសងខាងផ្លូវ ដើម្បីរំដោះទឹកភ្លៀងចេញ។

ការងារលើកកម្រិតដោយការងារស្ថាបនាក្រាលកៅស៊ូ AC រយ:ពេល ១៨ខែ ហើយបន្តថែទាំរយ:ពេល ៣៦ខែ សរុប ៥៤ខែ ដែលនឹងចាប់ផ្ដើមការដ្ឋាន ពីខែមេសា ឆ្នាំ២០១៨ រហូតដល់ ខែកញ្ញា ឆ្នាំ២០២២ ក្រោមហិរញ្ញប្រទានពីធនាគារពិភពលោក លេខ 5789-KH: គម្រោងគ្រប់គ្រងសម្បត្តិផ្លូវថ្នល់ ២ (Road Asset Management Project II – RAMP II) ដែលមានប្រវែងសរុប ១១១.៣ គ.ម និងចំណាយទឹកប្រាក់សរុបចំនួន ១៦.៩លានដុល្លាអាមេរិក។

ការស្ថាបនាផ្លូវជាតិលេខ៣ និងលេខ៧ សម្រាប់លើកនេះ នឹងធានាការ ប្រើប្រាស់ជាប់បានយូរ ដោយសារតែការចាក់កម្រាលកៅស៊ូ AC មានលក្ខណ:ក្រាស់ និងជាប់ជាងការស្ថាបនាមុនៗ ដោយសារតែការចំណាយថវិកាក៏ច្រើនជាងមុនផងដែរ។

ឯកឧត្តមបានបន្ថែមថា ក្រសួងសាធារណការ និងដឹកជញ្ជូន បានចំណាយថវិកាប្រមាណជិត ២០០លានដុល្លារ ក្នុងមួយៗឆ្នាំ សម្រាប់ការជួសជុល និងថែទាំផ្លូវដែលខូចខាត ដោយសារតែ រថយន្ដធំៗដឹកលើសទម្ងន់ ដែលបណ្ដាលឱ្យផ្លូវខូចខាតធ្ងន់ធ្ងន់។

នាពេលខាងមុខនេះ រាជរដ្ឋាភិបាលកម្ពុជា បាននិងកំពុងតែស្នើសុំទៅធនាគារពិភពលោក ដើម្បីផ្ដល់កម្ចីហិរញ្ញប្បទានសម្បទានចំនួន ទឹកប្រាក់ ១១០លានដុល្លារបន្ថែមទៀត សម្រាប់លើកកម្រិតផ្លូវជាតិលេខ៤ ដែលអាចក្រាល កៅស៊ូ AC ស្ថាបនាកៅស៊ូ AC និងបន្ថែមនូវប្រព័ន្ធ ប្រឡាយដែលចាំបាច់ ដើម្បីធានាឱ្យផ្លូវជាតិ លេខ៤ អាចដំណើរការបានគ្រប់រដូវផងដែរ។

សូមបញ្ជាក់ថា រាជរដ្ឋាភិបាលកម្ពុជា បានទទួលកម្ចីសម្បទានពីធនាគារពិភពលោក លើគម្រោងស្ថាបនា ផ្លូវជាតិលេខ៣ និងផ្លូវជាតិលេខ៧ ដែលមានទឹកប្រាក់សរុបចំនួន ៦០លានដុល្លារអាមេរិក៕