ខ្សែបម្រើប្រយុទ្ធប៊ែលហ្ស៊ុក Eden Hazard បានថ្លែងប្រាប់អ្នកសារពត៌មាននា​ពេលថ្មីៗនេះថា អ្នកគាំទ្រភាគច្រើន បានប្រដូចគាត់ជាមួយនឹងតារាបាល់ទាត់​ដ៍ឆ្នើម​ Lionel Messi តែសម្រាប់រូបគាត់ផ្ទាល់មិនគិតបែបនេះឡើយ។

ជាក់ស្តែងណាស់ បើតាមការចុះផ្សាយរបស់ Daily Star បានឲ្យដឹងថា Eden Hazard បានថ្លែងប្រាប់អ្នកគាំទ្រទាំងអស់ កុំឲ្យប្រដូចរូបគាត់ ជាមួយនឹងកំពូល​តារាបាល់ទាត់ដ៍ឆ្នើមលំដាប់ពិភពលោក Lionel Messi ឡើយ។ Hazard បាននិយាយថា៖ ការប្រៀបធៀបខ្ញុំ ជាមួយនឹង Lionel Messi វាហាក់ផ្ទុយស្រឡះ ពីការពិតខ្លាំងណាស់, Messi គាត់គឺជាកីឡាករមួយរូបកម្រមានណាស់ ក្នុងពិភពបាល់ទាត់ ដូចដែលលោក Conte ថាគាត់គឺជាកីឡាករ ៥០ឆ្នាំមានម្តង។ Hazard បានឲ្យដឹងទៀតថា​៖ សមត្ថភាពរបស់ខ្ញុំ មិនស្មើ Messi ឡើយ គាត់តែងតែធ្វើឲ្យមានការភ្ញាក់ផ្អើលក្នុងការប្រកួតម្តងៗ តាមរយៈភាពរហ័សរហួនរបស់គាត់ គួបផ្សំនឹងបច្ចេកទេសយ៉ាងប៉ិនប្រសព្វរបស់​គាត់ ដែលកម្រមានកីឡាកររូបណាអាចធ្វើបានដូចគាត់ណាស់។

យ៉ាងណាវិញ Hazard បាននិយាយមួយឃ្លាចុងក្រោយ យ៉ាងមានន័យថា​ ៖ អ្នកប្រដូចខ្ញុំជាមួយ Lionel Messi គួរតែសម្លឹងមើលពីសមទ្ធិផលរវាងពួកខ្ញុំទាំងពីរឡើងវិញ ព្រោះថា Messi គាត់ជួយក្លិបឈ្នះពានជាច្រើន រួមទាំងការឈ្នះពានផ្ទាល់ខ្លួនជាច្រើនទៀត ចំណែកខ្ញុំវិញ មានតិចតួចណាស់ ពោលសឹងតែគ្មានតែម្តង។ បើនិយាយពីការទាត់​បញ្ចូល​ទីឲ្យក្លិបវិញ មិនបាច់និយាយ ប្រៀបដូចមេឃនិងដី គាត់ស៊ុតបានច្រើន​ណាស់ ចំណែកខ្ញុំវិញ គឺចប់និយាយតែម្តង។