ព័ត៌មានសេដ្ឋកិច្ច

កំណាត់ផ្លូវជាតិលេខ ១ គ្រោងនឹងបញ្ចប់មុនចូលឆ្នាំខ្មែរ ជួយកាត់បន្ថយបញ្ហាកកស្ទះចរាចរណ៍

កំណាត់ផ្លូវជាតិលេខ ១ ប្រវែង ៤គីឡូម៉ែត្រ ចាប់ពីគល់ស្ពានព្រះមុនីវង្សដល់ ក្តីតាកុយ រំពឹងនឹងបញ្ចប់នៅខែមីនា ខាងមុខនេះ ខណ:បច្ចុប្បន្នសាងសង់បានប្រមាណ ៧០ភាគហើយ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មានជាតិ។

មន្ត្រីនៃក្រសួងសាធារណការ និងដឹកជញ្ជូន បានឲ្យដឹងថា គម្រោងនេះ នឹងបញ្ចប់នៅដំណាច់ខែមីនា ហើយអាចនឹងសេសសល់ខ្លះដូចជា ការរៀបចំចិញ្ចើមផ្លូវ ការរៀបការ៉ូឡាបន្ថែមទៀត មុខផ្ទះប្រជាពលរដ្ឋ និងការរៀបចម្បង្គោលអគ្គិសនីតាមដងផ្លូវថែមទៀត។

គម្រោងស្ថាបនាផ្លូវនេះ មានភាពយឺតយ៉ាវដោយសារតែ មានភ្លៀងធ្លាក់ជាបន្តបន្ទាប់ ការដោះស្រាយផលប៉ះពាល់ជាមួយប្រជាពលរដ្ឋ និងការធ្វើទៅតាមកម្រិតលក្ខណ:បច្ចេកទេសត្រឹមត្រូវ ដើម្បីធានាគុណភាពផ្លូវប្រើប្រាស់បានយូរអង្វែង។

ប្រសិនបើគម្រោងនេះស្ថាបនារួចរាល់ហើយ វានឹងជួយកាត់បន្ថយការកកស្ទះចរាចរណ៍របស់ប្រជាពលរដ្ឋ ព្រមទាំងលើកកម្ពស់សោភណភាព ក្នុងរាជធានីភ្នំពេញថែមទៀត។

គួរបញ្ជាក់ថា ការស្ថាបនាកំណាត់ផ្លូវនេះ គ្រោងនឹងចំណាយប្រមាណ ១០លានដុល្លារអាមេរិក ក្រោមជំនួយរបស់រាជរដ្ឋាភិបាលជប៉ុន ហើយរាជរដ្ឋាភិបាលកម្ពុជា បានចូលរួមថវិកាបដិភាគ ក្នុងការចំណាយអស់ប្រមាណជិត ១០លានដុល្លារអាមេរិកផងដែរ៕

មតិយោបល់