ធនាគារ Bred ដែលជាធនាគារដ៏ធំលំដាប់ទី ២ នៅប្រទេសបារាំង និងមានអាយុកាលជាង ១០០ឆ្នាំមកហើយ បានបើកសម្ពោធសាខាទី ១ របស់ខ្លួន នៅរាជធានីភ្នំពេញ។ នេះបើយោងតាមការឲ្យដឹងពីគេហទំព័ររបស់ក្រសួងពាណិជ្ជកម្ម ចេញផ្សាយកាលពីម្សិលមិញនេះ។

វត្តមានរបស់ធនាគារ Bred នឹងធ្វើឲ្យវិនិយោគិនបារាំងកាន់តែមានទំនុកចិត្ត និងភាពកក់ក្តៅក្នុងការមកបណ្តាក់ទុននៅកម្ពុជា ខណ:កម្ពុជា កំពុងត្រូវការទុនវិនិយោគ ដើម្បីជម្រុញគោលនយោបាយអភិវឌ្ឍន៍វិស័យឧស្សាហកម្ម។

លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម ក៏បានលើកឡើងដែរថា វត្តមាននៃធនាគារនេះ គឺជា សាក្ខីភាពបង្ហាញថា ពិភពលោកទាំងមូល មិនត្រឹមតែប្រទេសក្នុងតំបន់ កំពុងចាប់ផ្តើមទទួលស្គាល់អំពីសារ:សំខាន់របស់កម្ពុជា នៅក្នុងប្រព័ន្ធផ្គត់ផ្គង់ចង្វាក់តម្លៃសាកល។

សម្ព័ន្ធធនាគារ Bred Populaire របស់បារាំង មានបុគ្គលិកជាង ៤ម៉ឺននាក់ ហើយធនាគារក៏បានអនុវត្តយុទ្ធសាស្រ្តសហការជាមួយ សហគ្រាសទាំងក្នុងនឹងក្រៅប្រទេស សម្រាប់រយ:ពេលវែង ដើម្បីជម្រុញការវិនិយោគរបស់ពួកគេ៕