ពិព័រណ៍ស្ថាបត្យករ និងការតុបតែងកម្ពុជា ឆ្នាំ ២០១៧ នឹងបើកសម្ពោធជាផ្លូវការ ចាប់ពីថ្ងៃទី ៨ ដល់ទី ១០ ខែមិថុនាខាងមុខនេះ នៅមជ្ឈមណ្ឌលសន្និបាត និងពិព័រណ៍កោះពេជ្រ។ នេះបើយោងតាមសន្និសីទសារព័ត៌មាន ធ្វើឡើងនៅព្រឹកនេះ ក្រោមអធិបតីភាព លោក ភឿង សុភ័ណ្ឌ រដ្ឋលេខាធិការនៃ ក្រសួងរៀបចំដែនដី នគរូបនីយកម្ម និងសំណង់។

ការប្រព្រឹត្តិទៅជាលើកទី ២ នៃពិព័រណ៍ស្ថាបត្យករ និងការតុបតែងកម្ពុជា នឹងមានវត្តមានក្រុមហ៊ុនល្បីៗជាង ១៥០ក្រុមហ៊ុន ដែលនឹងចែករំលែកគំនិតច្នៃប្រឌិតថ្មីៗ ស្វែងរក​ឱកាសថ្មីៗ និងផ្លាស់ប្តូរបទពិសោធន៍អំពី ការរីកចម្រើននៃវិស័យសំណង់ផងដែរ។

លោក ភឿង សុភ័ណ្ឌ បានឲ្យដឹងថា មានកត្តា ៥យ៉ាងសំខាន់ ដែលជម្រុញឲ្យវិស័យសំណង់កាន់តែរីកចម្រើន រួមមាន សមត្ថភាព បច្ចេកទេសនិងបច្ចេកវិទ្យា សម្ភារ:សាងសង់ ថវិកា និងឆន្ទ:នយោបាយ។

លោក បន្តថា រដ្ឋាភិបាលកម្ពុជា តែងតែប្រឹងប្រែងជម្រុញវិស័យសំណង់ ឲ្យកាន់តែប្រសើរឡើង ដោយប្រើប្រាស់អត្តសញ្ញាណខ្មែរឲ្យបានកាន់តែច្រើន ពោលគឺ ក្រសួងតែងតែណែនាំ វិនិយោគិនឲ្យប្រើប្រាស់អត្តសញ្ញាណខ្មែរ​នៅក្នុងវិស័យសំណង់។

យ៉ាងណាមិញ ការជ្រើសរើសរចនាបថក្នុងការសាងសង់ គឺជាសិទ្ធិរបស់វិនិយោគិន ហើយអ្វីដែលកម្ពុជាអាចធ្វើបានគឺត្រូវបំផុសឈាមជ័រ ឲ្យកូនខ្មែរធ្វើចេញពីបេះដូង ព្យាយាមពន្យល់បង្ហាញដល់វិនិយោគិន ពីភាពអស្ចារ្យនៃរចនាបថខ្មែរ។

ជាចុងក្រោយ លោកក៏សង្ឃឹមដែរថា នាឱកាសតាំងពិព័រណ៍នេះ វិនិយោគិនមកពីបរទេស នឹងកសាងទំនាក់ទំនងជាមួយស្ថាប័នពាក់ព័ន្ធក្នុងស្រុក ដែលមានវត្តមានក្នុងពិព័រណ៍នេះ ដើម្បីចាប់ដៃគ្នាវិនិយោគ និងអភិវឌ្ឍន៍លើវិស័យសំណង់នៅកម្ពុជា ឲ្យបានកាន់តែរីកចម្រើន។

គួរជម្រាបដែរថា ក្រុមហ៊ុន ICVeX បានចាប់ដៃគូជាមួយ សមាគមស្ថាបត្យករកម្ពុជា CSA រៀបចំពិព័រណ៍នេះឡើងជាលើកទី ២ នៅកម្ពុជា៕