នៅព្រឹកនេះ ធនាគារ អេស៊ីលីដា បានប្រកាសដាក់ឲ្យប្រើប្រាស់ប័ណ្ណថ្មី ប្រភេទ EMV Chip ដើម្បីធានាសុវត្ថិភាពជូនអតិថិជនបានកាន់តែខ្ពស់ គ្មានការក្លែងបន្លំ និងមានសក្តានុពលខ្ពស់ ក្នុងការឈានទៅរកការទូទាត់ជាសកល។

ធនាគារ អេស៊ីលីដា នឹងចំណាយមិនតិចជាង ១លានដុល្លារអាមេរិកនោះទេ សម្រាប់ការប្តូរប័ណ្ណ ATM ប្រភេទ EMV (Europay, MasterCard, Visa) ចំនួន ៨សែនប័ណ្ណ ជូនអតិថិជនដោយឥតគិតថ្លៃ ចាប់ពីថ្ងៃទី ២៦ ខែឧសភា ឆ្នាំ ២០១៧នេះតទៅ។

លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា បានឲ្យដឹងថា បច្ចុប្បន្ន ធនាគារមានប័ណ្ណ ATM ប្រភេទ Magnetic stripe ប្រហែល ៨សែនប័ណ្ណ ដែលត្រូវជំនួសថ្មីដោយ ប័ណ្ណអេធីអឹម EMV chip។

ប័ណ្ណថ្មីនេះ អាចធ្វើប្រតិបត្តិការជាមួយ ទូ ATM ប្រហែល ៤០០ នៅតាមការិយាល័យធនាគារអេស៊ីលីដា និងម៉ាស៊ីនឆូតប័ណ្ណប្រហែល ៤០០០ នៅតាមទីតាំងដែលមានស្លាកសញ្ញា ACLEDA Bank Gold Dot។

ប័ណ្ណថ្មីនេះ អាចប្រើប្រាស់នៅក្នុងប្រទេសកម្ពុជា និងកំពុងអភិវឌ្ឍន៍នៅប្រទេសឡាវ អាចនឹងឈានទៅ បណ្តាប្រទេសក្នុងតំបន់អាស៊ាន នឹងឈានទៅ សកលលោក។

យ៉ាងណាមិញ ប័ណ្ណ ATM ចាស់ អាចប្រើប្រាស់បានធម្មតា ពុំមានផលប៉ះពាល់អ្វីនោះទេ ហើយប័ណ្ណថ្មី នឹងផ្តល់ជូនដល់អតិថិជន ក្រោយពេលធនាគារ ធ្វើការកែសម្រួល និងបោះពុម្ភរួច។

គួររម្លឹកដែរថា ធនាគារ អេស៊ីលីដា គ្រោងនឹងចំណាយប្រមាណ ៣.៥លានដុល្លារអាមេរិក លើការផ្លាស់ប្តូរនិមិត្តសញ្ញាថ្មីនេះ នៅតាមសាខាសរុប ២៥៩ទូទាំងប្រទេសកម្ពុជា ៤១សាខានៅប្រទេសឡាវ និង ៦សាខានៅមីយ៉ាន់ម៉ា៕