សេវាកម្មទូទាត់សាច់ប្រាក់ mVisa នឹងត្រូវបានដាក់ឲ្យប្រើប្រាស់ក្នុងប្រទេសកម្ពុជា ក្នុងត្រីមាសទីបីនៃឆ្នាំ ២០១៧ ហើយសេវាកម្មនេះ អនុញ្ញាតឲ្យអតិថិជនអាចប្រើប្រាស់ទូរសព្ទដៃ​របស់ខ្លួន ដើម្បីធ្វើ​ការទិញទំនិញ​ដោយពុំចាំបាច់មានសាច់ប្រាក់ក្នុងដៃ បង់វិក្កយបត្រ និងផ្ញើប្រាក់ទៅកាន់មិត្តភក្តិ និងក្រុមគ្រួសារ​ប្រកបដោយសុវត្ថិភាព តាមរយៈការភ្ជាប់កាតឥណពន្ធវីសា កាតឥណទាន ឬគណនីបង់ប្រាក់ជា​មុន ជាមួយនឹងកម្មវិធី mVisa។

Visa ដែលជាក្រុមហ៊ុនបច្ចេកវិជ្ជាទូទាត់ប្រាក់សកល បាន​ប្រកាសថា ខ្លួនកំពុងធ្វើការសហការជាមួយបណ្តាធនាគារក្នុងស្រុក និងពាណិជ្ជករនានា ដើម្បីបើក​ដំណើរការសេវាកម្មទូទាត់សាច់ប្រាក់ mVisa Quick Response (QR) code ទូរសព្ទដៃ ក្នុងគោល​បំណងបង្កើនល្បឿនការ​ផ្លាស់ប្តូរពីការទូទាត់សាច់ប្រាក់ ទៅជាការទូទាត់បែបអេឡិកត្រូនិក នៅ​ប្រទេសកម្ពុជា។

វានឹងធ្វើការផ្លាស់ប្តូរគណនីមូលដ្ឋានជាទម្រង់ឌីជីថល និងអនុញ្ញាត​ឲ្យអ្នកប្រើប្រាស់ អាចផ្ទេរប្រាក់ពីគណនីរបស់ខ្លួន ចូលទៅក្នុងគណនីពាណិជ្ជករ ប្រកបដោយសុវត្ថិភាព និងការទុកចិត្តតាមរយៈតាមការស្កេនកូដ QR។

ចំពោះពាណិជ្ជករ សេវាកម្ម mVisa អាចឲ្យពួកគេទទួលបានជម្រើសចំណាយទាប ក្នុងការទូទាត់​បែបអេឡិចត្រូនិក ដោយប្រើសេវាកម្ម mVisa QR code និងទូរសព្ទដៃរបស់ពួកគេ។

លោក Sean Preston អ្នកគ្រប់គ្រងក្រុមហ៊ុន Visa ប្រចាំប្រទេសវៀតណាម កម្ពុជា និងឡាវ បាន​មានប្រសាសន៍ថា៖ «តាមរយៈការប្រើប្រាស់ទូរសព្ទដៃ និងបច្ចេកវិជ្ជា QR code សេវាកម្ម mVisa ជួយបំពេញបន្ថែមមុខងារពីលើម៉ាស៊ីនឆូតកាត តាមរយៈការផ្តល់នូវប្រសិទ្ធភាពក្នុងការចំណាយសម្រាប់អាជីវកម្ម ដែល​បានទទួលយកសេវាកម្មទូទាត់សាច់ប្រាក់បែបអេឡិចត្រូនិក និងសម្រាប់អតិថិជនធ្វើការបង់ប្រាក់​តាមបែបអេឡិចត្រូនិក ជាជាងការប្រើប្រាស់សាច់ប្រាក់យកមកទូទាត់។»

ប្រតិបតិ្តការសេវាកម្ម​ mVisa ទាំងអស់ត្រូវបានដំណើរការតាមរយៈបណ្តាញជាសកល VisaNet ការអនុវត្តមាត្រដ្ឋាន ប្រកបដោយសុវត្ថិភាព និងភាពជឿទុកចិត្ដនៃការទូទាត់តាម Visa ទៅកាន់​ការទូទាត់តាមលេខកូដ QR។

គួរជម្រាបដែរថា Visa ជាក្រុមហ៊ុនទូទាត់ប្រាក់សកលលោក តាមបែបបច្ចេកវិជ្ជាដែលផ្សារភ្ជាប់អតិថិជន អាជីវកម្ម ស្ថាប័នហិរញ្ញវត្ថុ និងរដ្ឋាភិបាលនៅតាមបណ្ដាប្រទេស និងតំបន់ជាង ២០០កន្លែង ដែលមាន​ល្បឿនលឿន សុវត្ថិភាព និងអាចជឿទុកចិត្តបាន៕