អគ្គនាយកដ្ឋានពន្ធដារ បានប្រកាសប្រើប្រាស់តែមពន្ធថ្មី សម្រាប់បិទលើកញ្ចប់បារី ដែលមានភ្ជាប់ QR Code មិនអាចលួចបន្លំបាន ដើម្បីធានាប្រសិទ្ធភាពចំណូលពន្ធចូលជាតិ។ នេះបើយោងតាម ការចេញផ្សាយរបស់ ទីភ្នាក់ងារសារព័ត៌មានជាតិ ចេញផ្សាយកាលពីម្សិលមិញនេះ។

អគ្គនាយកដ្ឋានពន្ធដារ បានប្រកាសដល់ ក្រុមហ៊ុនផលិតបារីក្នុងស្រុក និងនាំចូលទាំងអស់ ត្រូវបានបិទតែមពន្ធថ្មីនៅលើ កញ្ចប់បារី បើពុំដូច្នោះទេ ចាប់ពីខែសីហាខាងមុខនេះតទៅ គឺមិនអនុញ្ញាតឲ្យធ្វើចរាចរលក់ នៅលើទីផ្សារឡើយ។

លោក គង់ វិបុល អគ្គនាយកនៃអគ្គនាយកដ្ឋានពន្ធដារ បានឲ្យដឹងថា ការសម្រេចដាក់ឲ្យប្រើប្រាស់តែមថ្មីនេះ គឺធានាដល់ការទប់ស្កាត់ ការក្លែងបន្លំសន្លឹកតែមពន្ធនៅលើទីផ្សារ ដែលនាំឲ្យបាត់បង់ចំណូលជាតិ។

តែមពន្ធថ្មីនេះ មានលក្ខណៈពិសេសជាច្រើន ដូចជា មានសុវត្ថិភាពទាំងក្រដាសពណ៌ទឹកថ្នាំ មើលតាមរយៈម៉ាស៊ីនអេឡិចត្រូនិក មាន QR Code បង្ហាញអំពីព័ត៌មាន ឈ្មោះក្រុមហ៊ុន។

ចាប់ពីថ្ងៃទី ១ ខែសីហា នេះតទៅ រដ្ឋបាលសារពើពន្ធ គ្រោងនឹងចុះពិនិត្យទៅតាមទីផ្សារ ពីការអនុវត្តប្រភេទតែមពន្ធថ្មីលើកញ្ចប់បារី ហើយករណីឃើញមានកញ្ចប់បារី នៅតែបិទតែមចាស់ ឬគ្មានការបិទតែមបង់ពន្ធនោះ នឹងត្រូវរឹបអូស។ ដូច្នេះ អាជីវករទាំងអស់ ដែលនៅសល់ផលិតផលបារី មានបិទតែមចាស់ ត្រូវតែបញ្ជូនត្រឡប់មកឲ្យក្រុមហ៊ុនវិញ ចៀសវាងការរឹបអូស និងការព្រមានមួយចំនួន។

គួរជម្រាបដែរថា ប្រជាពលរដ្ឋកម្ពុជាប្រមាណជា ១ម៉ឺននាក់ ស្លាប់ជារៀងរាល់ឆ្នាំដោយសារជម្ងឺ ពាក់ព័ន្ធនឹងការប្រើប្រាស់ថ្នាំជក់ គិតជាមធ្យមគឺ ៣០នាក់ស្លាប់ជារៀងរាល់ថ្ងៃ៕