ក្នុងរយៈពេល ៧ឆ្នាំចុងក្រោយ គិតចាប់ពីឆ្នាំ ២០១០ ក្រុមហ៊ុនអភិវឌ្ឍន៍លំនៅដ្ឋានដែលទទួលបានអាជ្ញាប័ណ្ណពី ក្រសួងសេដ្ឋកិច្ច និងហិរញ្ញវត្ថុ មានសរុប ២១៣គម្រោង ដែលមានទុនសរុប ៣៣៧៥លានដុល្លារអាមេរិក។ នេះបើយោងតាមការលើកឡើងរបស់ លោកជំទាវ ងួន សុខា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ កាលពីម្សិលមិញនេះ។

ក្នុងគម្រោងទាំងនោះ រួមមាន គម្រោងបុរី មាន ១៣២គម្រោង ស្មើនឹងជាង ៣ម៉ឺនផ្ទះ និងអគារសហកម្មសិទ្ធិ មាន ៨១គម្រោង ស្មើនឹងជិត ៣ម៉ឺនបន្ទប់។

លោកជំទាវ បានបន្តឲ្យដឹងទៀតថា វិស័យសំណង់ ជាចំណុចស្នូលមួយ នៃការផ្លាស់ប្តូរនៅក្នុងប្រទេសកម្ពុជា ហើយបានបង្កើតរហូតដល់ ១ភាគ១០ នៃផលិតផលក្នុងស្រុកសរុប និងបានបង្កើតការងារដោយផ្ទាល់ និងដោយប្រយោលជាច្រើនផងដែរ។

នៅក្នុងសិក្ខាសាលាលើកទី ១ ស្តីអំពី ទិដ្ឋភាពច្បាប់ និងបទដ្ឋានគតិយុត្តលើ ការវិនិយោគវិស័យសំណង់នៅកម្ពុជា លោក លី ហួរ ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា បានឲ្យដឹងថា ការរៀបចំសិក្ខាសាលានេះ គឺជាលើកទី ១ ហើយ ដែលសមាគម សហការជាមួយ រាជរដ្ឋាភិបាល រួមមាន ក្រសួងសេដ្ឋកិច្ច និងហិរញ្ញវត្ថុ អគ្គនាយកដ្ឋានពន្ធដារ និងរដ្ឋាករទឹកស្វយ័តក្រុងភ្នំពេញ ដើម្បីចែករំលែកចំណេះដឹង ផ្នែកច្បាប់ និងនីតិវិធីផ្សេងៗ ក្នុងគោលបំណង ចូលរួមចំណែកអភិវឌ្ឍន៍វិស័យសំណង់នៅកម្ពុជា ឲ្យកាន់តែប្រសើរឡើង។

លោក បញ្ជាក់ថា សិក្ខាសាលានេះ រៀបចំឡើងដោយសមាគមអ្នកអភិវឌ្ឍន៍លំនៅដ្ឋានកម្ពុជា នឹងធ្វើឡើងជាបន្តបន្ទាប់ទៀត ក្នុងពេលឆាប់ៗខាងមុខនេះ។

គួរជម្រាបដែរថា យោងតាមរបាយការណ៍អភិវឌ្ឍន៍វិស័យសំណង់ របស់ សមាគមអ្នកអភិវឌ្ឍន៍លំនៅដ្ឋានកម្ពុជា បានបង្ហាញឲ្យដឹងថា នៅក្នុងត្រីមាសទី២ ឆ្នាំ ២០១៧ វិស័យសំណង់នៅកម្ពុជា មានទុនវិនិយោគសរុបជិត ៥ពាន់លានដុល្លារអាមេរិក កើនឡើងជាង ២៧ភាគរយ ធៀបនឹងពេលដូចគ្នាកាលពីឆ្នាំមុន៕