លោក Scott Price ប្រធានរដ្ឋបាលនៃក្រុមហ៊ុន វ៉លម៉ាតអន្តរជាតិ បានជួបពិភាក្សាការងារជាមួយ​ លោក អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងបានបង្ហាញពី ចំណាប់អារម្មណ៍របស់ក្រុមហ៊ុន វ៉លម៉ាត ក្នុងការចូលមកបណ្តាក់ទុនធ្វើអាជីវកម្ម នៅកម្ពុជា។

លោក Scott Price ចាប់អារម្មណ៍ខ្លាំងចំពោះ សក្តានុពលកម្ពុជា និងស្ថានភាពវិវត្តន៍រីកចម្រើនសេដ្ឋកិច្ច របស់ប្រទេសកម្ពុជា ដែលជាឱកាសដ៏ល្អ សម្រាប់ក្រុមហ៊ុន ពិចារណាក្នុងការបណ្តាក់ទុននៅកម្ពុជា។

លើសពីនេះ ក្រុមហ៊ុន នឹងបន្តបង្កើនការបញ្ជាទិញទំនិញផលិតផលសម្លៀកបំពាក់ និងស្បែកជើងពីកម្ពុជា រួមទាំងទំនិញសម្ភារៈធ្វើដំណើរ ដែលកម្ពុជា ទើបទទួលបានភាពអនុគ្រោះពាណិជ្ជកម្ម ពីអាមេរិកផងដែរ។

លោកជឿជាក់ថា អតិថិជនរបស់វ៉លម៉ាត នឹងពេញចិត្តនូវប្រភពទំនិញ ដែលវ៉លម៉ាតបញ្ជាទិញ ពីកម្ពុជាសម្រាប់ចែកចាយតាមហាងនានា នៅសហរដ្ឋអាមេរិក កាណាដា និងប្រទេសនានាទូទាំងពិភពលោក។

គួរបញ្ជាក់ថាក្រុមហ៊ុន វ៉លម៉ាត ជាក្រុមហ៊ុនអាមេរិកដ៏ធំ ដែលមានទីស្នាក់ការធំនៅ ទីក្រុង Bentonville រដ្ឋ Arkansas វិនិយោគទៅលើផ្សារទំនើបឈ្មោះថា វ៉លម៉ាត ហើយបច្ចុប្បន្នមាន ហាងលក់ទំនិញយីហោ Walmart ជាង ៦២០០ហាង នៅសហរដ្ឋអាមេរិក និងជាង ៨៥០,០០០ហាងទៀតនៅក្នុង ២៧ប្រទេស។

ក្រុមហ៊ុន វ៉លម៉ាត ជាក្រុមហ៊ុន ដែលមានចំណូលធំជាងគេក្នុងពិភពលោក ប្រហែល ៤៨០ពាន់លានដុលារអាមេរិក ហើយក៏ជាក្រុមហ៊ុន ដែលមានកម្មករនិយោជិតច្រើនជាងគេនៅលើពិភពលោកផងដែរ ប្រមាណ ២.៣លាននាក់៕