Post News Media ព័ត៌មានសេដ្ឋកិច្ច បុណ្យឆ្លងឆ្នា...

បុណ្យឆ្លងឆ្នាំសកល ខេត្តព្រះសីហនុ ទទួលភ្ញៀវទេសចរជាង ២សែននាក់

លោក តាំង សុចិត្តគ្រឹស្នា ប្រធានមន្ទីរ​ទេសចរណ៍​ខេត្ត​ព្រះសីហនុ​ បានឱ្យដឹង​ថា ក្នុងពិធីបុណ្យ​ឆ្លងឆ្នាំសកល​រយ:ពេល ៣ថ្ងៃ គឺចាប់ពីថ្ងៃទី២៩ ដល់ថ្ងៃទី៣១ ខែធ្នូ ឆ្នាំ២០១៧ នៅ​ខេត្តព្រះសីហនុ​ទទួលបានភ្ញៀវ​ទេសចរជាតិ អន្តរជាតិចំនួន ២១៥,០០០នាក់។

ចំនួននេះ គឺមានការកើន​ឡើងចំនួន ២.៣៨​ភាគរយ ធៀបនឹងឆ្នាំ ២០១៦ ក្នុងនោះភ្ញៀវទេសចរ​ជាតិមានចំនូន ១០៩០០០នាក់ កើនឡើង ១.០៥ភាគរយ និងភ្ញៀវ​ទេសចរអន្តរជាតិ​មានចំនួន ១៨,០០០នាក់ កើនឡើង ២.៦២ ភាគរយ ។

លោកប្រធានមន្ទីរទេសចរណ៍បានឱ្យដឹងបន្តថា ភ្ញៀវទេសចរបរទេសចូលតាមច្រកកំពង់ផែ​សមុទ្រមាន​ចំនួន ២០៣១នាក់ ស្រី ៨៤៦នាក់ ក្នុងនោះ​មានភ្ញៀវទេសចរ​សរុបចំនួន ១៤០៣នាក់ ស្រី ៧៥០នាក់ និងនាវិក ៦២៨នាក់ ស្រី ៩៦នាក់។

ភ្ញៀវទេសចរ​ទៅលេងកម្សាន្តតាម​កោះនានា ក្នុងខេត្តព្រះសីហនុ ពិសេសកោះរ៉ុង និងកោះរ៉ុងសន្លឹម មានចំនួន ៦២៣៥នាក់ ក្នុងនោះស្រីមានចំនួន ២៨៧៤នាក់ ក្នុងនោះភ្ញៀវទេសចរ​ជាតិមានចំនួន ៣៧២៩នាក់ កើន ៤២ភាគរយ ស្រី ១៧៧០នាក់ និងអន្តរជាតិមានចំនួន ២៥០៦នាក់ ស្រី១២០៤នាក់ ។

លោក តាំង សុចិត្តគ្រឹស្នា បានបន្តថា ភ្ញៀវទេសចរចូលតាមច្រកព្រលានយន្តហោះអន្តរជាតិ​កងកេងខេត្ត​ព្រះសីហនុ ​មាន៣៣ជើង ស្មើនឹង ២១៥០នាក់ ក្នុងនោះភ្ញៀវជាតិ​មានចំនួន ៣៣១នាក់ និងភ្ញៀវ​អន្តរជាតិ ១៨១៩នាក់ ។

​ក្នុងឱកាសបុណ្យឆ្លងឆ្នាំសកលឆ្នាំ ២០១៧ ឈាន​ចូល​ឆ្នាំ២០១៨ នៅខេត្តព្រះសីហនុ ​ប្រជាពលរដ្ឋ និងភ្ញៀវទេសចរបាន​ចូលរួមអបអរសាទរ​សម្បាយរីករាយ​យ៉ាង​ច្រើនកុះករ ដោយមានការសហការ​ជាមួយរដ្ឋបាលខេត្ត ក្រុង រួមជាមួយអាជីវករ ដើម្បីស្វែងរកវិធាន​ការ​ដោះស្រាយ​​បញ្ហាតម្លៃស្នាក់នៅ ក៏ដូចសេវាម្ហូបអាហារ​ជាដើម បានសមរម្យក៏ដូចជា​ការពង្រឹងគុណភាព​សេវាកម្ម ការពង្រឹងសណ្តាប់ធ្នាប់បរិស្ថានអនាម័យ នៅតាមរមណីយដ្ឋាននានាបាន​ល្អប្រសើរក្នុង​ការទាក់ទាញ​ឱ្យភ្ញៀវ​ទេសចរ​មកសម្រាកកម្សាន្ត​នៅខេត្តព្រះសីហនុ កាន់តែច្រើន​នាពេលខាងមុខ៕