នៅក្នុងខែមករា ដើមឆ្នាំ ២០១៧ កម្ពុជា បាននាំអង្ករចេញប្រមាណជិត ៥ម៉ឺនតោន ទៅកាន់ប្រទេសចំនួន ៣៤។ នេះបើយោងតាមរបាយការណ៍របស់ ក្រសួងកសិកម្ម រុក្ខាប្រមាញ់ និងនេសាទ បានចេញផ្សាយកាលពីពេលថ្មីៗនេះ។

បរិមាណអង្ករនាំចេញគឺប្រមាណ ៤៨,៨២០តោន កើនឡើងជាង ១០ភាគរយ បើធៀបនឹងពេលដូចគ្នាកាលពីឆ្នាំមុន ដែលក្នុងនោះ អង្ករក្រអូបគ្រប់ប្រភេទ មានប្រមាណ ៥៨ភាគរយ អង្ករ ស គ្រប់ប្រភេទមានប្រមាណ ៣៦ភាគរយ និងអង្ករចំហុយ មាន ៥ភាគរយ។

នៅក្នុងចំណោមប្រទេសទាំង ៣៤ខាងលើ ប្រទេសចិនឈរលំដាប់ទី ១ (១៨ពាន់តោន) បារាំងលំដាប់ទី ២ (៨ ពាន់តោន) ប៉ូឡូញលំដាប់ទី ៣ (៤ពាន់តោន)។ល។

រីឯក្រុមហ៊ុននាំចេញ មានចំនួន ៤៧ក្រុមហ៊ុន ដែលនាំមុខគេដោយ ទី១. ក្រុមហ៊ុន Baitang Kampuchea មាន ៤៩០៣តោន ទី២. ក្រុមហ៊ុន City Rice Import Export មាន ៣៩៦១តោន ទី៣. ក្រុមហ៊ុន Cristal Rice មាន ៣៩៦១តោន។ល។

តាមការសន្និដ្ឋាន បរិមាណអង្ករនាំចេញ មានការកើនឡើងនេះ ជាសញ្ញាល្អ ដើម្បីសម្រេចនូវគោលដៅរំពឹងទុករបស់រាជរដ្ឋាភិបាល ក្នុងការនាំចេញអង្ករឲ្យទទួលបានជោគជ័យ៕