កាលពីពេលថ្មីៗនេះ នៅក្នុងជំនួបរវាងសម្តេចអគ្គមហាសេនាបតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាមួយ លោក អ៊ីលហាន់ ខេម៉ាល់ទុក (IL Han Kemal Tug) ឯកអគ្គរដ្ឋទូតទួគី ដែលទើបបញ្ចប់អាណត្តិបេសកកម្មការទូតនៅព្រះរាជាណាចក្រកម្ពុជា សម្តេចតេជោ ក៏បានជំរាបជូនឯកអគ្គរដ្ឋទូតទួគី អំពីការយកចិត្តទុកដាក់ជំរុញអោយមានការហោះហើរផ្ទាល់ពីតួគីមកកម្ពុជា។

ទន្ទឹមនឹងនេះ សម្តេចតេជោ ចង់ឃើញពីការរីកចម្រើននៃពាណិជ្ជកម្មរវាងប្រទេសទាំងពីរកាន់តែរីកចម្រើនខ្លាំងថែមទៀត។

យ៉ាងណា ឯកអគ្គរដ្ឋទូត សម្តែងការសោកស្តាយដោយសារ មិនបានបង្កើតឲ្យមាន ជើងហោះហើរត្រង់ នៅក្នុងអាណត្តិរបស់លោក ហើយលោកសង្ឃឹមថា អ្នកបន្តវេន នឹងអាចជម្រុញឲ្យមានជើងហោះហើរត្រង់នេះ។

ដើម្បីអោយទំនាក់ទំនង និងកិច្ចសហប្រតិបត្តិការប្រទេសទាំងពីរកាន់តែរឹងមាំ និងរីកចម្រើន សម្តេចតេជោ បានស្នើគួរតែមានការផ្លាស់ប្តូរ និងពិគ្រោះយោបល់រវាងប្រទេសទាំងពីរឱ្យបានញឹកញាប់បំផុត។

ក្នុងនាមរដ្ឋាភិបាលតួគី លោកឯកអគ្គរដ្ឋទូតបានគោរពអញ្ជើញសម្តេចតេជោ នាយករដ្ឋមន្ត្រី ទៅបំពេញទស្សនកិច្ចនៅប្រទេសតួគី ក្នុងពេលវេលាដ៏សមស្របណាមួយនៅពេលខាងមុខ។

កិច្ចប្រជុំបានបញ្ចប់ដោយបរិយាកាសស្និទ្ឋស្នាល និងទទួលបានលទ្ឋផលល្អ ដែលជួយពង្រឹងបន្ថែមនូវចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរអោយកាន់តែរឹងមាំខ្លាំងឡើងថែមទៀត៕