ភ្នំពេញ: ធនាគារឯកទេសវីង ខេមបូឌា ដែលជាធនាគារផ្តល់សេវាផ្ទេរប្រាក់ចល័តដំបូងគេនៅក្នុងប្រទេសកម្ពុជា បានទទួលពានរង្វាន់ជាធនាគារឯកទេសផ្នែកសេវាហិរញ្ញវត្ថុចល័តឈានមុខគេនៅកម្ពុជាក្នុងឆ្នាំ ២០១៦ ដែលផ្តល់ដោយស្ថាប័ន Global Business Outlook។ នេះបើយោងតាមគេហទំព័រហ្វេសប៊ុកផ្លូវការរបស់ វីង ចេញផ្សាយកាលពីពេលថ្មីៗនេះ។

លោក ចូចូ ម៉ាឡូឡូស អគ្គនាយកនៃធនាគារឯកទេសវីង បានឲ្យដឹងថា រង្វាន់ដែលវីងទទួលបាននៅថ្ងៃនេះ  បង្ហាញថា វីងមិនត្រឹមតែជាធនាគារឈានមុខគេប៉ុណ្ណោះទេ ថែមទាំងជាធនាគារឯកទេសដែលមានទំនុកចិត្ត និងមានផ្តល់សេវាផ្ទេរប្រាក់ឈានមុខគេ នៅក្នុងប្រទេសផងដែរ។ លើសពីនេះទៅទៀត នេះគឺជាការឆ្លុះបញ្ចាំងពីការប្តេជ្ញាចិត្ត ក្នុងការផ្តល់ជូនសេវាកម្មដែលមានភាពងាយស្រួល រហ័ស និងមានសុវត្ថិភាពបំផុតសម្រាប់ប្រជាជនកម្ពុជា។

រង្វាន់នេះ បានបង្ហាញថា វីង បានខិតខំយ៉ាងខ្លាំងដើម្បីកសាង មូលដ្ឋានគ្រឹះដ៏រឹងមាំក្នុងការ ជំរុញសេវាផ្ទេរប្រាក់ ទៅកាន់អ្នកដែលមាន ឬក៏គ្មានគណនីធនាគារ។ ជាមួយភ្នាក់ងារវីង ជិត ៥០០០ កន្លែង នៅទូទាំង ២៥ខេត្តក្រុង ប្រជាជនកម្ពុជាទាំងអស់អាចបង់វិក្កយបត្រ ឬ ទទួលប្រាក់ពីសាច់ញាត្តិដែលធ្វើការនៅទីក្រុង ឬក៏ ដាក់ប្រាក់ចូលទៅក្នុងគណនីបានដោយងាយស្រួល។

លោក បានបន្តទៀតថា“ យើងមានគោលបំណងក្នុងការផ្តល់ជូនអតិថិជននូវបទពិសោធដ៏ល្អបំផុតនៅក្នុងវិស័យសេវាហិរញ្ញវត្ថុចល័ត ដូចជា ការផ្ទេរប្រាក់ បញ្ជូលលុយទូរស័ព្ទ បង់វិក្កយបត្រ និងសេវាទូទាត់ប្រាក់តាមអនឡាញជាដើម។ ជាមួយគ្នានេះដែរ វីងមានគោលបំណង ក្នុងការរក្សាកិត្តិនាមជាធនាគារឯកទេសផ្នែកសេវាហិរញ្ញវត្ថុឈានមុខគេ និងល្អបំផុតលើវិស័យផ្ទេរប្រាក់នៅក្នុងប្រទេសកម្ពុជា។”

គួរបញ្ជាក់ផងដែរថា Global Business Outlook គឺជាក្រុមហ៊ុនដែលមានទីតាំងនៅចក្រភពអង់គ្លេស និងធ្វើការផ្តោតទៅលើវិស័យធនាគារ ក្រុមហ៊ុនធានារ៉ាប់រង និងឧស្សាហកម្មសំខាន់ៗផ្សេងៗទៀត៕