យើងដឹងហើយថា អំឡុងពេលមានគភ៌ស្ត្រីមិនអាចប្រើប្រាស់ផលិតផលអ្វីផ្តេសផ្តាសបាននោះទេ ព្រោះវាអាចបង្កឲ្យមានផលប៉ះពាល់ដល់ទារកក្នុងផ្ទៃ។ នេះហើយជាមូលហេតុដែលធ្វើឲ្យស្ត្រីភាគច្រើនតែងតែធ្លាក់សម្រស់អំឡុងពេលមានគភ៌ បើទោះបីជាមានបញ្ហាស្នាមអុជខ្មៅពេញផ្ទៃស្បែកក៏មិនហ៊ានប្រើអ្វីដែរ។

ស្នាមអុជខ្មៅ ភាគច្រើនតែងតែកើតមានដោយសារពន្លឺព្រះអាទិត្យ ឬការផលិតជាតិពណ៌មេឡានីនច្រើនពេកក្នុងអំឡុងពេលមានផ្ទៃពោះ។ ក៏ប៉ុនតែការផលិតជាតិពណ៌នេះអាចការពារបានដោយមិនចាំបាច់ប្រើប្រាស់ផលិតផលគីមីដែលនាំឲ្យមានផលប៉ះពាល់ឡើយ។ បើយោងតាមគេហទំព័រ soha បានបង្ហាញថា ក្រៅពីជៀសវាងការត្រូវកម្តៅព្រះអាទិត្យ ស្ត្រីមានគភ៌គួរតែព្យាយាមប្រើប្រាស់ឱសថធម្មជាតិពីរយ៉ាងនេះ។

ផ្លែទទឹម
ទឹកទទឹមមានផ្ទុកអាស៊ីត ellagic ដែលអាចជួយការពារ និងកម្ចាត់ស្នាមអុជខ្មៅនៅលើផ្ទៃស្បែកយ៉ាងមានប្រសិទ្ធភាព។

អ្នកគ្រាន់តែយកផ្លែទទឹមស្រស់ៗទៅកិនយកទឹក ហើយម៉ាស្សានៅលើស្បែកដែលមានស្នាមអុជខ្មៅជារៀងរាល់ថ្ងៃ ស្បែកនឹងមានសភាពប្រសើរឡើងវិញ។

ប្រទាលកន្ទុយក្រពើ
ប្រទាកកន្ទុយក្រពើ ក៏ជាឱសថធម្មជាតិដែលល្អបំផុតសម្រាប់បញ្ហាស្បែកស្ងួត និងឡើងជាតិពណ៌ផងដែរ។ មិនតែប៉ុណ្ណោះ វាអាចជួយការពារស្បែកមិនឲ្យមានស្នាមអុជខ្មៅដោយសារតែពន្លឺព្រះអាទិត្យ។

ដើម្បីព្យាបាលបញ្ហាស្នាមអុជខ្មៅ អ្នកត្រូវកាត់យកប្រទាលកន្ទុយក្រពើមួយធាង ហើយបកយកសាច់។ យកទៅម៉ាស្សាត្រង់កន្លែងដែលមានស្នាមអុជខ្មៅឲ្យសព្វ រួចទុករយៈពេល ១៥នាទី ទើបលាងសម្អាតដោយប្រើទឹកធម្មតា។ ក្នុងការព្យាបាលបញ្ហានេះ ស្ត្រីមានគភ៌ត្រូវអនុវត្តជារៀងរាល់ថ្ងៃ ប៉ុន្តែសម្រាប់អ្នកដែលចង់ការពារគួរអនុវត្តត្រឹមតែ៣ដងក្នុងមួយសប្តាហ៍បានហើយ៕