ភ្នំពេញៈ ជារឿងគួរឲ្យត្រេកអរ និងសាទរចំពោះប្រភេទសត្វត្រីផ្សោតទន្លេងមេគង្គ ដែលជាប្រភេទសត្វដ៏កម្រ និងជិតផុតពូជនៅលើភពផែនដី បានបង្កើតកូនថ្មី៨ក្បាល ក្នុងរយៈពេល១ឆ្នាំ។ នេះបើតាមអង្គការអភិរក្ស WWF។
អង្គការ WWF ដែលធ្វើការលើការងារអភិរក្សសត្វ បានសរសេរលើទំព័រហ្វេសប៊ុករបស់ខ្លួន កាលពីថ្ងៃម្សិលមិញថា «មានកូនត្រីផ្សោតសរុបចំនួន៨ក្បាល បានកើតចាប់ពីខែមករា ឆ្នាំ២០១៦ រហូតមកដល់ខែធ្នូ ឆ្នាំ២០១៦នេះ។ យើងសង្ឃឹមថា ពួកគេនឹងបន្តលូតលាស់ រហូតដល់ធំពេញវ័យ ដោយសុវត្ថិភាព»។
ទោះយ៉ាងក្ដី អង្គការ WWF ក៏បានសម្តែងនូវការសោកស្តាយ ខណៈដែលត្រីផ្សោតចំនួន៦ក្បាល ត្រូវបានគេប្រទះឃើញងាប់ ដែលមូលហេតុចម្បងនៃការស្លាប់ទាំងនេះ គឺបណ្តាលមកពីការនេសាទខុសច្បាប់ ហើយទាមទារឲ្យមានការរឹតបន្តឹង ការអនុវត្តច្បាប់បន្ថែមទៀត ពីសំណាក់អាជ្ញាធរពាក់ព័ន្ធដើម្បីអភិរក្សបេតិកភណ្ឌជាតិមានជីវិតមួយនេះ និងសូមអំពាវនាវដល់ប្រជាសហគមន៍ទាំងអស់ កុំធ្វើការនេសាទខុសច្បាប់នៅក្នុងតំបន់អភិរក្សសត្វផ្សោតនេះ។
គួរបញ្ជាក់ថា តំបន់អន្លង់ត្រីផ្សោត រស់នៅទន្លេមេគង្គ ត្រូវបានអង្គការអភិរក្សទូទាំងពិភពលោក ទទួលស្គាល់ថា ជាកន្លែងរស់នៅចុងក្រោយមួយនៅលើភពផែនដីយើងនេះ និងជាប្រភេទដូហ្វីនដ៏កម្រតែមួយគត់នៅកម្ពុជា ដែលវាជិតផុតពូជទៅហើយ។ ក្នុងនោះ សត្វផ្សោត បានរស់នៅក្នុងអន្លុងជ្រៅៗទាំង៤ មានដូចជា អន្លង់ឈើទាល អន្លង់កោះសំពាយ អន្លង់កោះកូនសត្វ និងអន្លង់ត្បូងខ្លា ដែលរាល់សត្វផ្សោតទាំងនោះ គឺបាន និងកំពុងទាក់ទាញភ្ញៀវទេសចរជាតិអន្តរជាតជាច្រើនឲ្យមកទស្សនា។
សត្វផ្សោតនៅក្នុងទន្លេមេគង្គ ត្រូវបានគេចាត់ថ្នាក់ជាប្រភេទសត្វកំពុងរងគ្រោះថ្នាក់ជិតផុតពូជនៅក្នុងបញ្ជីក្រហមរបស់អង្គការ IUCN និងក្នុងឧបសម្ព័ន្ធទី១ នៃអនុសញ្ញា ស្តីពីការធ្វើពាណិជ្ជកម្មជាអន្តរជាតិ លើប្រភេទសត្វ និងរុក្ខជាតិកំពុងរងគ្រោះ ហៅកាត់ថា CITES ដែលសុទ្ធសឹងជាទម្រង់អន្តរជាតិខ្ពស់ជាងគេបង្អស់នៃការចាត់ថ្នាក់ប្រភេទសត្វកំពុងរងគ្រោះ។ សត្វផ្សោត ក៏ត្រូវបានដាក់បញ្ចូលក្នុងអនុក្រឹត្យ នៃប្រទេសកម្ពុជា ស្តីពីការកំណត់អត្តសញ្ញាណប្រភេទធនធានជលផលកំពុងរងគ្រោះផងដែរ៕
មតិយោបល់