អាមេរិក: ប៉ូលិសនៅរដ្ឋផ្លរីដាបានអះអាងថា ជនរងគ្រោះចំនួនពីរនាក់បានស្លាប់​នៅ​ក្នុងការបាញ់ប្រហារនៅឯក្លឹបរាត្រីយុវវ័យ ដែលពួកគេមានអាយុ ១៤ឆ្នាំនិង១៨ឆ្នាំ។ ហើយប៉ូលិសថា ការបាញ់ប្រហារសម្លាប់មនុស្សនៅក្លឹបរាត្រីនេះ មិនមែនករណីភេរវកម្មនោះទេ។ នេះបើយោងតាមការ​ចេញ​ផ្សាយដោយសារព័ត៌មានចិនស៊ិនហួ នៅយប់ថ្ងៃទី២៥ កក្កដា ឆ្នាំ២០១៦នេះ។

ប៉ូលិសក្រុង Fort Myers បាននិយាយថា មនុស្សចំនួនបីនាក់ ត្រូវបាន​ចាប់ឃុំខ្លួន ដែលជាប់ពាក់ព័ន្ធទៅ​នឹងករណីបាញ់ប្រហារមនុស្សស្លាប់ ២នាក់និងរបួស ១៧នាក់ នៅឯ​ក្លឹប​រាត្រីយុវវ័យ នៅរដ្ឋផ្លរីដា សហរដ្ឋ​អាមេរិក។

សូមបញ្ជាក់ថា កាលពីថ្ងៃទី១២ មិថុនា ឆ្នាំ២០១៦ កន្លងទៅថ្មីៗនេះ អាមេរិកក៏ធ្លាប់មានករណីបាញ់​សម្លាប់​រង្គាល នៅក្នុងក្លឹបរាត្រីស្រឡាញ់ភេទដូចគ្នា ដែលភាគច្រើនសុទ្ធតែមនុស្សភេទទីបី នាទីក្រុង Orlando រដ្ឋផ្លរីដា ដែលបានបណ្តាលឲ្យមនុស្សស្លាប់ ៥០នាក់ និងរងរបួស ៥៣នាក់ផ្សេងទៀត ក្រោយមក​ក្រុមរដ្ឋអ៊ី​ស្លាមជ្រុលនិយម ក៏បានចេញមុខប្រកាសទទួលខុសត្រូវលើករណីនេះ៕