ភ្នំពេញ: ត្រឹមតែរយ:ពេល១ខែ ពោល គឺខែកក្កដា ឆ្នាំ២០១៦ ក្រសួងសាធារណការ និងដឹកជញ្ជូន បានធ្វើការពិន័យបានទឹកប្រាក់ប្រមាណជិត៤៦០លានរៀល ចូលថវិការដ្ឋ និងចាប់រថយន្តដឹកលើសទម្ងន់១៩០គ្រឿង ព្រមទាំងព្រមានម្ចាស់យានយន្តទាំងនោះឲ្យឈប់បន្តដឹកលើសទម្ងន់កំណត់ បើមិនដូច្នេះទេ ក្រសួងនឹងចាត់វិធានការបិទការធ្វើអាជីវកម្ម និងឃាត់រថយន្តទុករយ:ពេល១ឆ្នាំ។ នេះបើតាមការចេញផ្សាយពីបណ្ដាញសង្គមរបស់ក្រសួងមួយនេះ នាព្រឹកថ្ងៃទី៩ ខែសីហា ឆ្នាំ២០១៦។

ហ្វេសប៊ុកផ្លូវការរបស់ក្រសួងសាធារណការ និងដឹកជញ្ជូន ឲ្យដឹងថា នៅខែកក្កដា ឆ្នាំ២០១៦ លេខាធិការដ្ឋានរបស់គណ:កម្មាធិការសម្របសម្រួលអចិន្ត្រៃយ៍ នៃគណ:កម្មាធិការដឹកនាំការត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់ ចាប់បានរថយន្តដឹកទំនិញលើសទម្ងន់កម្រិតកំណត់ ចំនួន១៩០គ្រឿង និងពិន័យបានថវិកាសរុបចំនួន៤៥៩.៣៨៨.០០០រៀល។ ជាមួយគ្នានេះ ក្រសួងសង្កេតឃើញថា ចំនួនរថយន្តដែលចាប់បានទាំងនេះ មានការធ្លាក់ចុះ៧៥គ្រឿង ពី២៦៥គ្រឿង នៅក្នុងខែមិថុនា មកត្រឹម១៩០គ្រឿង ក្នុងខែកក្កដា។

ប្រភពដដែលបន្តថា ក្នុងចំណោមរថយន្តទាំង១៩០គ្រឿងនោះ មានរថយន្តផ្ទុកលើសទម្ងន់កម្រិតកំណត់ ជាមធ្យមចាប់ពី៤តោន រហូតដល់៣៣តោន។ តាមរបាយការណ៍របស់ក្រុមការងារជំនាញ មានរថយន្ត២គ្រឿង ដែលផ្ទុកលើសជាច្រើនតោន មិនធ្លាប់មានពីខែកន្លងមក រហូតដល់ទៅ៣៨តោន និង៤៨តោន ដែលរថយន្តទាំងនេះ គឺកក្តាចម្បងដែលធ្វើឲ្យខូចផ្លូវថ្នល់សាធារណ:មុនអាយុកាល។ រថយន្តដែលដឹកលើសទម្ងន់ដល់ទៅ៣៨តោន គឺជារថយន្តដែលចាប់បាននៅស្ថានីយថ្នល់កែង ខេត្តកំពង់ចាម និងរថយន្តដែលផ្ទុកលើសដល់៤៨តោន ចាប់បាននៅស្ថានីយខែលជ័យ ខេត្តកំពង់ចាម។

ចំពោះករណីនេះ គណ:កម្មាធិការសម្របសម្រួលអចិន្រ្តៃយ៍ នៃគណ:កម្មាធិការដឹកនាំការត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់ បានធ្វើការព្រមានដល់ម្ចាស់យានយន្ត ដែលបានដឹកលើទម្ងន់ទាំង២គ្រឿងនោះ ថាប្រសិនបើមានករណីបែបនេះកើតឡើងម្តងទៀត ក្រសួង និងមន្ត្រីមានសមត្ថកិច្ច នឹងធ្វើការឃាត់រថយន្តទុករយ:ពេល១ឆ្នាំ និងបិទការធ្វើអាជីវកម្មរយ:ពេល១ឆ្នាំ ព្រមទាំងដកហូតប័ណ្ណបើកបររយ:ពេល២ឆ្នាំ ផងដែរ៕