ភ្នំពេញ៖ ឧកញ៉ា ពីររូប មាន ឧកញ៉ា ហុង ពីវ និង ឧកញ៉ា តាំង គួង ត្រូវបានសមាជិកសភាពាណិជ្ជកម្មរាជធានីភ្នំពេញ បោះឆ្នោតឲ្យជាប់ ជាសមាជិកថ្មី នៃសភាពាណិជ្ជកម្មរាជធានីភ្នំពេញ ដោយបេក្ខភាពទាំងពីររូបទទួលបានសំលេងគាំទ្រចំនួន ២៥/២៥ ជាឯកច្ឆ័ន ។
យោងតាមហ្វេសប៊ុក សភាពាណិជ្ជកម្មរាជធានីភ្នំពេញបានឲ្យដឹងថាពិធីជ្រើសរើសបង្រ្គប់សមាជិកជ្រើសតាំងសភាពាណិជ្ជកម្មរាជធានីភ្នំពេញ អាណត្តិទី៣ លើកទី២នាព្រឹកថ្ងៃទី១៥ ខែសីហា ឆ្នាំ២០១៦ សភាពាណិជ្ជកម្មរាជធានីភ្នំពេញ បានរៀបចំពិធីជ្រើសរើសបង្រ្គប់សមាជិកជ្រើសតាំងសភាពាណិជ្ជកម្មរាជធានីភ្នំពេញ អាណត្តិទី៣ លើកទី២ ក្រោមអធិបតីភាព អ្នកឧកញ៉ា គិត ម៉េង ប្រធានសភាពាណិជ្ជកម្មរាជធានីភ្នំពេញ/កម្ពុជា និងមានការចូលរួមពីសមាជិកជ្រើសតាំងនៃសភាពាណិជ្ជកម្មរាជធានីភ្នំពេញ ដែលប្រារព្ធធ្វើឡើងនៅអគ្គនាយកដ្ឋានសភាពាណិជ្ជកម្មកម្ពុជា។
ពិធីខាងលើនេះ ប្រារព្ធធ្វើឡើងដើម្បីជ្រើសរើសសមាជិកជ្រើសតាំងសភាពាណិជ្ជកម្មរាជធានីភ្នំពេញចំនួនពីររូបបន្ថែមទៀត មាន ឧកញ៉ា ហុង ពីវ និង ឧកញ៉ា តាំង គួង ដើម្បីបង្រ្គប់ចំនួនគូរ៉ុមសរុប៤០រូបនិងជំនួសឱ្យសមាជិកជ្រើសតាំងចាស់ពីររូបដែលបានលាលែងពីតំណែង។
ជាលទ្ធផលនៃពិធីជ្រើសរើសដែលបោះឆ្នោតដោយសមាជិកជ្រើសតាំងសភាពាណិជ្ជកម្មរាជធានីភ្នំពេញ បេក្ខភាពទាំងពីររូបទទួលបានសំលេងគាំទ្រចំនួន ២៥/២៥ ជាឯកច្ឆ័ន៕
មតិយោបល់