ថៃ: បើតាមអ្នកអង្កេតការណ៍ បានព្រមានថា ការចូលទិវង្គតរបស់ព្រះអង្គ Bhumibol Adulyadej អាចនឹងធ្វើឲ្យប្រទេសធ្លាក់ចូលទៅក្នុងភាពចលាចលជាថ្មី ខណ:ដែលគេធ្លាប់ដឹងហើយថា នៅក្នុងដំណាក់កាលព្រះអង្គគ្រងរាជសម្បត្តិ ព្រះរាជាណាចក្រថៃ បានកើតមានអំពើរដ្ឋប្រហារចំនួន ១៧ លើក ដែលមានចំនួនច្រើនជាងគេលើពិភពលោក ហើយរដ្ឋប្រហារលើចុងក្រោយ គឺទម្លាក់រដ្ឋាភិបាលស្របច្បាប់របស់លោកស្រី យ៉ីង ទ្បាក់ ហើយគ្រប់គ្រងដោយរបបយោធាដឹកនាំដោយលោក ប្រាយុទ្ធចាន់ អូចា ជានាយរដ្ឋមន្ត្រីបច្ចុប្បន្ន។ នេះបើយោងតាមរយ: សារព័ត៌មានចិនសិង្ហបុរី ចេញផ្សាយនៅថ្ងៃទី១៤ ខែតុលា ឆ្នាំ២០១៦។

អំទ្បុងពេលដំណឹងស្ថានភាពព្រះរាជសុខភាពព្រះមហាក្សត្រថៃ មិនរឹងមាំ គេសង្កេតឃើញថា ទីផ្សារភាគហ៊ុនថៃ មានការធ្លាក់ចុះ ដែលជាលទ្ធផលនៅពេលនេះ គេសន្និដ្ឋានបានថា នយោបាយប្រទេសនេះ អាចប្រឈមនឹងភាពចលាចលនាពេលខាងមុខ។

គួរបញ្ជាក់ដែរថា មេដឹកនាំពិភពលោកជាច្រើន បានចូលរួមសម្ដែងការគោរព និងរំលែកទុក្ខ បន្ទាប់ពីការសោយទិវង្គតព្រះមហាក្សត្រថៃ Bhumibol Adulyadej ព្រះជន្ន ៨៨ ព្រះវស្សា ដែលជាស្ដេចមួយអង្គទទួលបានការគោរពស្រទ្បាញ់យ៉ាងច្រើនពីប្រជាជនទូទាំងប្រទេស នៅក្នុងរជ្ជកាលដឹកនាំរបស់ព្រះអង្គចំនួនប្រាំពីរទសវត្សរ៍៕