ហ្វីលីពីន: មន្ត្រីជាន់ខ្ពស់រដ្ឋាភិបាលមួយរូបបានឱ្យដឹងនៅថ្ងៃអង្គារ៍ថា ប្រធានា​ធិប​តី​​ហ្វីលីពីនលោក Rodrigo Duterte មិនបានអនុម័តច្បាប់បាញ់​សម្លាប់រង្គាលក្រៅ​ប្រព័ន្ធ​តុលាការនោះទេ ដើម្បីឆ្លើយតបទៅនឹងការលើកឡើងរបស់សហរដ្ឋអាមេរិក ដែលម្សិលមិញ បានសម្តែង​ក្តី​បារម្ភចំពោះវិធានការក្តៅរបស់ប្រធានាធិបតីថ្មីរូបនេះ ពាក់ព័ន្ធលើការបង្រ្កាបលើមេឈ្មួញគ្រឿងញៀន។

បើយោងតាមការចេញផ្សាយដោយសារព័ត៌មានចិនស៊ិនហួ នៅថ្ងៃទី៩ សីហា ឆ្នាំ២០១៦ អ្នកនាំពាក្យ​ប្រធានា​ធិបតី​លោក Ernesto Abella បានឱ្យដឹងថា លោក Duterte បានបញ្ជាឱ្យធ្វើការស៊ើបអង្កេត​លើការចោទប្រកាន់ជនសង្ស័យទាក់ទងនឹងថ្នាំញៀន។

លោកបានសង្កត់ធ្ងន់ថា «យើងចង់ធ្វើឱ្យសេចក្តីថ្លែងការណ៍មួយថា ប្រធានាធិបតីលោក Rodrigo Roa Duterte បានសម្តែងម្តងហើយម្តងទៀតថា លោកមិនគាំទ្រចំពោះការសម្លាប់ក្រៅប្រព័ន្ធតុលាការនោះ​ទេ​។ ប៉ុន្តែលោកបានទទួលស្គាល់ផងដែរថា បុគ្គលមួយចំនួនអាចត្រូវបានសង្គ្រោះ បើសិនពួកគេចូលខ្លួនឲ្យ​សមត្ថកិច្ច​តាម​សំរួល ប៉ុន្តែបើមិនប្រគល់ខ្លួនទេ ទាំងប្រជាពលរដ្ឋនិងថ្នាក់ក្រោមជាតិមានសិទ្ធិសម្លាប់ពួកគេ។

លោក Abella មានប្រតិកម្មលើសេចក្តីថ្លែងការណ៍ពីក្រសួងការបរទេសអាមេរិក បានសម្តែងការព្រួយ​បារម្ភ​របស់​សហរដ្ឋអាមេរិក នៅលើការសម្លាប់ក្នុងប្រទេសហ្វីលីពីនរបស់ឈ្មួញថ្នាំញៀនជាបន្តបន្ទាប់។ ហើយអគ្គនាយកប្រធានប៉ូលិសជាតិលោក Ronald dela Rosa នឹងធ្វើការស៊ើបអង្កេតករណីបាញ់សម្លាប់​ទាក់ទងនឹងគ្រឿងញៀននេះ។

សេចក្តីរាយការណ៍មួយចំនួនបាននិយាយចោទប្រកាន់ថា មានមនុស្សជាង ៤០០នាក់​បានចូលរួមនៅក្នុង​គ្រឿង​ញៀន​ខុសច្បាប់ បានត្រូវគេសម្លាប់ចាប់តាំងពីលោក Duterte ឡើងតំណែងកាលពីថ្ងៃទី៣០ ខែមិថុនា។

ដោយឡែក លោកប្រធានាធិបតីបានបញ្ចេញឈ្មោះអ្នកជាប់ពាក់ព័ន្ធគ្រឿងញៀន​ជាសាធារណៈជាង ១៥០នាក់ ក្នុងនោះរួមមាន ចៅក្រម, មន្រ្តីរដ្ឋាភិបាលក្នុងតំបន់, ប៉ូលិសនិងបុគ្គលិកយោធា ដែលត្រូវបាន​គេសង្ស័យថា អាចជាប់ពាក់ព័ន្ធនៅក្នុងការរីកសាយនៃថ្នាំខុសច្បាប់។ រីឯអ្នកប្រើនិងរត់ពន្ធគ្រឿងញៀន ជាង ៦០០.០០០នាក់​បានប្រគល់ខ្លួនរួចទៅហើយឲ្យអាជ្ញាធរ៕