កណ្តាល:អ្នកភូមិម្នាក់ ត្រូវអ្នកភូមិដូចគ្នា យកឈើជ្រុងវាយពីក្រោយត្រូវក្បាល និងដងខ្លួនបណ្តាលឲ្យ របួសធ្ងន់ ពេលសាច់ញាតិ បញ្ជូនទៅកាន់មន្ទីរពេទ្យកាល់ម៉ែត្រ ក៏ដាច់ខ្យល់ស្លាប់។

ហេតុការណ៍ប្រើអំពើហិង្សា បណ្តាលឲ្យស្លាប់នេះ កើតឡើងនៅថ្ងៃទី២៨ ខែមេសា ឆ្នាំ២០១៦ វេលាម៉ោង២១និង៣៥នាទី នៅចំណុចភូមិព្រែក ឃុំត្រើយស្លា ស្រុកស្អាង ខេត្តកណ្តាល។

លោកវរ:សេនីយ៍ សេង សុជាតិ អធិការនគរបាលស្រុកស្អាង បានឲ្យដឹងថា ជនរងគ្រោះ ឈ្មោះលុក ប៊ុនធឿន ភេទប្រុស អាយុ៥៥ឆ្នាំ នៅភូមិព្រែក ឃុំត្រើយស្លា ស្រុកស្អាង ខេត្តកណ្តាល មុខរបរកសិករ (ស្លាប់ពេលបញ្ជូនទៅដល់មន្ទីរពេទ្យកាល់ម៉ែត្រភ្នំពេញ)។ ជនសង្ស័យឈ្មោះ ចាំ ម៉ាប់ ភេទប្រុស អាយុ ២៦ឆ្នាំនៅភូមិព្រែក ឃុំត្រើយស្លា ស្រុកស្អាង ខេត្តកណ្តាល មុខ របរ កសិករ ( គេចខ្លួន )។ វត្ថុតាងចាប់យក ឈើជ្រុងចំនួនមួយប្រវែង ១០២សង់ទីម៉ែត្រទទឹង១០សង់ទីម៉ែត្រ ។

លោកអធិការ ឲ្យដឹងទៀតថា មុនពេលកើតហេតុឈ្មោះ លុក ប៊ុនធឿន បានមកអង្គុយលេងកំដរផ្ទះបុណ្យសពឈ្មោះហ៊ីម ដែលទើបនិងស្លាប់។ ពេលនោះ មានឈ្មោះ ថុក ភេទប្រុស បានឲ្យលុយចំ នួន២០០០រៀល ទៅឈ្មោះ ប៊ុនធឿន ទៅទិញស្រា ផ្ទះឈ្មោះ នួនលីឡា (ម៉ាប់ ) តែមិនបើកទ្វាលក់ស្រា ឲ្យក៏ត្រឡប់មកវិញមកអង្គុយលេងជាមួយឈ្មោះ ថុក នៅផ្ទះបុណ្យសពដដែល។ពេលកំពុងអង្គុយនិយាយគ្នាជាមួយឈ្មោះ ថុក ឈ្មោះ ប៊ុនធឿន បាននិយាយរឿងទៅទិញស្រាផ្ទះឈ្មោះ ម៉ាប់ អត់បើកទ្វារ ស្រាប់តែពេលនោះឈ្មោះ ចាំ ម៉ាប់ ( មនុស្សផ្សេង ម្នាក់ទៀតជាជនដៃដល់)មានសភាពស្រវឹងស្រា បានដើរមកដល់លឺ ឈ្មោះ លុកប៊ុនធឿន និយាយចំឈ្មោះខ្លួនក៏ខឹងបានដើរយកឈើជ្រុងនៅក្បែនោះវាយទៅលើឈ្មោះ លុកប៊ុនធឿន ចំក្បាល និងខ្លួនចំនួន៣ ឈើជ្រុងបណ្តាលឲ្យដួលទៅដី។ ចំណែកឈ្មោះ ចាំ ម៉ាប់ពេលវាយទៅលើជនរងគ្រោះរួចបានទម្លាក់ ឈើជ្រុងចោល នៅកន្លែងកើតហេតុរួចគេចខ្លួនបាត់តែម្តង។ ភ្លាមនោះឈ្មោះ លុក ប៊ុនធឿន ត្រូវបានបងប្អូនបញ្ជូនទៅកាន់មន្ទីរពេទ្យកាល់ម៉ែត្រភ្នំពេញ ក៏បានស្លាប់នៅមន្ទីរពេទ្យតែម្តង។

លោកអធិការបញ្ជាក់ថា នៅព្រឹក ថ្ងៃទី២៩ ខែមេសា ឆ្នាំ២០១៦ ក្រុមគ្រួសារបានយកសពជនរងគ្រោះមកដល់ផ្ទះហើយ សមត្ថកិច្ចបច្ចេកទេសស្រុកពិនិត្យសាកសពឃើញថា ជនរងគ្រោះស្លាប់ដោយសារមានស្នាមមុតផុងលលាដ៍ក្បាល ផ្នែកខាងលើ ស្នាមជាំឆ្អឹងជំនីខាងស្តាំ និងស្នាមជាំនៅស្មាខាងឆ្វេង។

បន្ទាប់ពីបានពិនិត្យសាកសពរួច ក្រុមជំនាញបានប្រគល់សាកសពជូនក្រុមគ្រួសាដើម្បីធ្វើបុណ្យតាមប្រពៃណី។ ចំណែកជនល្មើស សមត្ថកិច្ចកំពុងតាមចាប់ខ្លួន យកមកផ្ដន្ទាទោសតាមផ្លូចច្បាប់៕