ស៊ីរី: យ៉ាងហោចណាស់សិស្សសាលា ៧នាក់ និងស្ត្រីម្នាក់ ត្រូវបានសម្លាប់ ខណ:ដែលមនុស្សរាប់សិបនាក់រងរបួស ក្នុងការវាយប្រហារមួយ របស់ពួកភេរវករ នៅគ្រឹះស្ថានអប់រំសុខាភិបាល ដែលជាតំបន់រដ្ឋាភិបាលកាន់កាប់ នៅភាគខាងលិខទីក្រុងអាឡេប៉ូ។ នេះបើយោងតាមរយ: សារព័ត៌មានបរទេស ចេញផ្សាយនៅថ្ងៃទី២១ ខែវិច្ឆិកា ឆ្នាំ២០១៦។

សិស្សសាលាទាំងនោះ ត្រូវបានគេសម្លាប់នៅពេលដែលគ្រាប់រ៉ុក្កែតមួយ បានវាយប្រហារ នៅគ្រឹះស្ថានអប់រំសុខាភិបាល ក្នុងសង្កាត់ al-Forqan ហើយបើតាមអ្នករាយការណ៍ SANA បានឲ្យដឹងថា ការវាយប្រហារនេះផងដែរ បានបង្កឲ្យរងរបួសគ្រូបង្រៀនម្នាក់ និងសិស្ស ១៩នាក់ ដែលឥឡូវនេះ ពួកគេកំពុងស្ថិតក្នុងស្ថានភាពធ្ងន់ធ្ងរ។

ក្នុងការវាយប្រហារដាច់ដោយឡែកមួួយផ្សេងទៀត ស្ត្រីម្នាក់ ត្រូវបានគេសម្លាប់ និងរាប់សិបនាក់ទៀត រងរបួស ក្នុងសង្កាត់ al-Shahbaa នៅមហាវិទ្យាល័យច្បាប់ មន្ទីរពេទ្យវះកាត់បេះដូង al-Base និងសាលា Fawzi al-Jesri ។

គួរបញ្ជាកដែរថា ក្រុមសកម្មប្រយុទ្ធ បានបាញ់ផ្លោងតំបន់លំនៅដ្ឋាន ភាគខាងលិចទីក្រុងអាឡេប៉ូ ស្ទើរតែរាល់ថ្ងៃហើយ ចាប់តាំងពីកងទ័ពស៊ីរី ដែលគាំទ្រដោយប្រទេសរុស្ស៊ី និងសម្ព័ន្ធមិត្តផ្សេងទៀត បានធ្វើការហ៊ុំព័ទ្ធក្រុមភេរវករ Al-Nusra Front និងសកម្មប្រយុទ្ធសម្ព័ន្ធមិត្តខ្លួន នៅភាគខាងកើតទីក្រុងអាឡេប៉ូ៕