ប៉េកាំង: ប្រទេសចិន នៅថ្ងៃសុក្រ ទី១៨នេះបានឆ្លើយតបចំពោះការសាងសង់របស់ប្រទេសវៀតណាម នៅកោះក្នុងសមុទ្រចិនខាងត្បូង ដោយចិនបានជំរុញឲ្យប្រទេសនេះ បញ្ឈប់ការកាន់កាប់របស់ខ្លួន និងរាល់សកម្មភាពខុសច្បាប់នៅលើបូរណភាពទឹកដីរបស់ចិន។

ទីភ្នាក់ងារព័ត៌មានចិន ស៊ិនហួ ចេញផ្សាយនៅថ្ងៃទី១៨ ខែវិច្ឆិកា ឆ្នាំ២០១៦ បានឲ្យដឹងដោយផ្អែកតាមការលើកឡើងរបស់អ្នកនាំពាក្យក្រសួងការបរទេសចិន លោក Geng Shuang នៅក្នុងសន្និសីទសារព័ត៌មានថា «ចិនប្រឆាំងយ៉ាងដាច់ខាតចំពោះការចូលកាន់កាប់ដោយខុសច្បាប់របស់វៀតណាម នៅតំបន់ថ្មប៉ប្រះទឹក នៅក្នុងសមុទ្រចិនខាងត្បូង និងការសាង់សង់នៅក្នុងបូរណភាពទឹកដីរបស់ចិន»។

ចិនក៏បានឆ្លើយតបចំពោះសំណួរពាក់ព័ន្ធនឹងរបាយការណ៍របស់វិទ្យាស្ថានស្រាវជ្រាវអាម៉េរិក ដែលថា រូបភាពពីផ្កាយរណបគឺបង្ហាញថា ប្រទេសវៀតណាម កំពុងបន្តសាងសង់ផ្លូវចូលទៅកាន់កោះ ណាន់សា ដោយបញ្ហានេះ លោកថា «ចិនទទូចឲ្យប្រទេសដែលពាក់ព័ន្ធ ត្រូវគោរពបូរណភាពទឹកដី និងផលប្រយោជន៍របស់ចិន និងត្រូវដកសម្ភារ: និងបុគ្គលិកខ្លួនចេញពីតំបន់នោះ»៕