ភ្នំពេញៈ ជនសង្ស័យម្នាក់ ត្រូវបានសន្តិសុខផ្សារនាគមាស ចាប់ខ្លួន បន្ទាប់ជនសង្ស័យរូបនេះ បានឆក់ទូរស័ព្ទដៃម៉ាក អាយហ្វូន៥ មួយគ្រឿងពីក្មេងស្រីម្នាក់ ដែលកំពុងចុចលេងនៅលើម៉ូតូកង់បី។

ហេតុការណ៍ឆក់នេះ បានកើតឡើង នៅក្នុងមូលដ្ឋានសង្កាត់ផ្សារដើមគរខណ្ឌទួលគោក រាជធានីភ្នំពេញ វេលាម៉ោងប្រហែល៧ : ០០នាទី ថ្ងៃទី១៨ ខែវិច្ឆិកា ដោយនគរបាលប៉ុស្តិ៍រដ្ឋបាលផ្សារដើមគរ ខណ្ឌទួលគោក រាជធានីភ្នំពេញ បានឃាត់ខ្លួនជនសង្ស័យ០១នាក់ពីបទលួច ( ឆក់ទូរស័ព្ទដៃ ) នៅចំណុចមុខផ្ទះលេខ៣៥ ផ្លូវ២៣១ ក្រុមទី៣០ ភូមិ ៦ សង្កាត់ផ្សារដើមគរ ខណ្ឌទួលគោក រាជធានីភ្នំពេញ។

ជនសង្ស័យ ឈ្មោះ ឆែត រតន: ហៅម៉ាប់តូច ភេទប្រុស អាយុ១៨ ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅមិនពិតប្រាកដ មានទីកន្លែងកំណើត ភូមិត្រពាំងឈូក ឃុំ ខ្សែត ស្រុកកំពង់រោទ៍ ខេត្តស្វាយរៀង ។ ជនរងគ្រោះ ក្មេងស្រីអាយុប្រហែល ១២ឆ្នាំជនជាតិខ្មែរ ( មិនស្គាល់អត្តសញ្ញាណ ) ក្រោយកើតហេតុឪពុកបានដឹកម៉ូតូកង់បីជិះចេញទៅបាត់។ វត្ថុតាងចាប់យករួមមាន កាបូបស្ពាយម៉ាកBally មួយក្នុងនោះមាន ,ដែកសំប៉ែតកែឆ្នៃសំរាប់កាច់កម៉ូតូចំនួន០១ , កូនសោរខ្សៀរលេខ៨ចំនួន០១ និងកូនសោរម៉ូតូចំនួន០១ ( ចាប់យកពីជនសង្ស័យឈ្មោះ ឆែត រតន: ហៅម៉ាប់តូច ) ។

សមត្ថកិច្ចបានឲ្យដឹងថា មុនពេលកើតហេតុជនរងគ្រោះជាក្មេងស្រី មិនស្គាល់អត្តសញ្ញាណ អាយុប្រហែល ១២ឆ្នាំ បានអង្គុយលេងទូរស័ព្ទដៃម៉ាក I phone 5 ពណ៌ស នៅលើម៉ូតូកង់បីដោយឪពុកបានចូលទៅក្នុងផ្សារនាគមាសទិញផ្លែឈើ ភ្លាមនោះស្រាប់តែជនសង្ស័យឈ្មោះ ឆែត រតន: ហៅម៉ាប់តូច បានដើរមកក្បែរជនរងគ្រោះ រួចបានធ្វើសកម្មភាពឆក់ទូរស័ព្ទដៃពីដៃជនរងគ្រោះ ហើយរត់គេចខ្លួន។ ពេលនោះ ឪពុករបស់ក្មេងស្រីជនរងគ្រោះ បានឃើញក៏ស្រែកថាចោរៗ ពេលនោះសន្តិសុខផ្សារនាគមាស ក៏បានស្ទាក់ឃាត់ជនសង្ស័យបានរួចសន្តិសុខបានដកយកទូរស័ព្ទដៃពីដៃជនសង្ស័យ ពេលនោះ ឪពុកក្មេងស្រី ជនរងគ្រោះ ក៏បានមកយកទូរស័ព្ទម៉ាកI phone 5 ពណ៌ស ដៃពីសន្តិសុខ ហើយដឹកកូនជិះម៉ូតូកង់បីចេញទៅបាត់ ។

បច្ចុប្បន្នជនសង្ស័យកំពុងឃាត់ខ្លួនជាបណ្ដោះអាសន្ន នៅអធិការដ្ឋាននគរបាលខណ្ឌទួលគោក រាជធានីភ្នំពេញ ដើម្បីសាកសួរ និងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមផ្លូវច្បាប់៕