ថៃ: ទឹកប្រាក់ចំនួនជាង ៥លានបាត ត្រូវបានក្រុមតម្រួតថៃ រកឃើញវិញហើយ
កាលពីល្ងាចថ្ងៃទី២៥ ខែវិច្ឆិកា ឆ្នាំ២០១៦ បន្ទាប់ពីមានជនមិនស្គាល់មុខម្នាក់
បានប្រើប្រាស់កាំភ្លើងខ្លីភ្ជង់ប្លន់ ទៅលើរថយន្តរបស់ធនាគារក្រុងថៃ ពេលកំពុងដឹកលុយទាំងនេះ ទៅដាក់បញ្ចូលបន្ថែមតាមបណ្តាទូរ ATM ក្នុងខេត្ត សុផាន់បុរី ប្រទេសថៃ ។

គួររំលឹកដែរថា កាលពីថ្ងៃទី២១ ខែវិច្ឆិកា ឆ្នាំ២០១៦ វេលាម៉ោង ១២ ថ្ងៃត្រង់ មានរថយន្តមួយគ្រឿងរបស់ធនាគារ ក្រុងថៃ បានដឹកលុយជាច្រើន ដើម្បីយកទៅដាក់បន្ថែមទៅក្នុងទូរ ATM តាម
បណ្តោយផ្លូវបាងលី ស្ថិតនៅជាប់នឹងស្ថានីយ៍ប្រេងឥន្ធន: ptt ក្នុងស្រុកសងភីណង ខេត្តសុផាន់បុរី ប្រទេសថៃ ។

របាយការណ៍បានបន្តថា លុះនៅពេលដែលរថយន្តបានបត់ចូលទៅក្នុងស្ថានីយ៍
ហើយបានឈប់ចតចម្ងាយពីទូរ ATM ប្រហែល៥ម៉ែត្រ នឹងស្របពេលដែល
បុគ្គលិករបស់ធនាគារទាំង៣នាក់ កំពុងទាញយកកាបូបលុយបម្រុងនឹងចុះទៅ
ដាក់បញ្ចូលក្នុងទូរ ក៏ស្រាប់តែមានមនុស្សប្រុសម្នាក់ បានជិះម៉ូតូពាក់មួយសុវត្ថិភាព
បិទមុខជិះចូលមកក្បែហើយ បានដកកាំភ្លើងខ្លីបាញ់ ទៅលើចំនួន៣គ្រាប់ ដើម្បីបំបាក់ស្មារតី រួចបានបែរកាណុងភ្ជង់ទៅលើបុគ្គលិកធនាគារទាំងអស់ ដោយគេបាន
ទាញយកកាបូបលុយឡើងម៉ូតូជិះចេញទៅ ដោយបានបាញ់មួយគ្រាប់ទៀតទុកជាការ
ព្រមានចុងក្រោយ ។ ចំណែកលុយដែលជនសង្ស័យ បានប្លន់យកទៅ សរុបគឺមាន
ចំនួន ៥.១៣០.០០០ បាត ។

ភ្លាមៗនោះដែរ ក្រុមតម្រួតខេត្ត សុផាន់បុរី បានបោះដៃតាមរយ:វិទ្យុទាក់ទង ទៅ
កាន់បណ្តាខេត្តមួយចំនួន ដែលនៅក្បែរពិសេស គឺក្រុមតម្រួតក្នុងខេត្តអាងថង តែម្តង
ព្រោះក្រោយពេលប្លន់ គឺមុខសញ្ញាបានធ្វើដំណើរឆ្ពោះទៅកាន់គោលដៅនោះ ។

នៅទីបំផុត គឺនៅល្ងាចថ្ងៃទី២៥ ខែវិច្ឆិកា ឆ្នាំ២០១៦ ក្រុមតម្រួតខេត្តអាងថង
បានឃាត់ខ្លួនមុខសញ្ញាប្លន់នោះ បានដោយសំអាងទៅលើរូបភាពដែលកាមេរ៉ា
សុវត្ថិភាពរបស់ស្ថានីយ៍ប្រេងឥន្ធន:ចាប់យកបាន។

នៅចំពោះមុខសមត្ថកិច្ច ជនសង្ស័យបានសារភាពថា ខ្លួនពិតជាបានធ្វើសកម្មភាពប្លន់
រថយន្តរបស់ធនាគារនោះយ៉ាងពិតប្រាកដ ប៉ុន្តែដោយសារតែមិនហ៊ានដឹកកាបូបលុយ
យកទៅឆ្ងាយ ខ្លួនក៏បានបោះចូលទៅក្នុងទឹកប្រឡាយខ្សាច់ ក្នុងព្រៃមួយកន្លែង ក្នុង
ភូមិ១ ឃុំដនម៉ាក់ណាវ ស្រុកសងភីណង ខេត្តសុផាន់បុរី ដែលទីនោះគឺគ្មានអ្នកណា
ចូលទៅដល់នោះឡើយ ។

យោងតាមការចង្អុលបង្ហាញពីជនសង្ស័យ នៅទីបំផុតកាបូបលុយនោះត្រូវបានរកឃើញវិញ
ទាំងយប់ ព្រមទាំងបានយកមករាប់មើល ដោយសរុបទឹកប្រាក់ដែលនៅសល់ក្នុងកាបូប
មានចំនួន ៤ ៥៨៧ ១០០ បាត ដោយបច្ចុប្បន្នសមត្ថកិច្ចកំពុងចាត់វិធានការតាមផ្លូវច្បាប់
ហើយទៅលើមុខសញ្ញាប្លន់ប្រដាប់អាវុធនេះ ៕