Post News Media ព័ត៌មានអន្តរជាតិ កងទ័ពស៊ីរី យក...

កងទ័ពស៊ីរី យកឈ្នះពួក ISIS ដោយដណ្តើមបានទីក្រុងបុរាណ Palmyra មកគ្រប់គ្រងវិញ

(ផាលមីរ៉ា)៖ ក្រោយពីការវាយសម្រុកអស់ជាច្រើនសប្តាហ៍ ទីបំផុតកងទ័ពស៊ីរីអាចយកឈ្នះកងទ័ពរបស់ពួក រដ្ឋអ៊ីស្លាម ISIS ដែលបានគ្រប់គ្រងទីក្រុងបុរាណ Palmyra អស់ជិតមួយឆ្នាំនោះ ហើយស៊ីរីបានប្តេជ្ញាទៀតថា នឹងដណ្តើមទឹកដីសំខាន់ៗ ដែលកំពុងគ្រប់គ្រងដោយពួកជីហាដ ត្រឡប់មកវិញផងដែរ។ នេះបើតាមការផ្សាយ របស់ទីភ្នាក់ងារព័ត៌មានស៊ិនហួ នៅថ្ងៃច័ន្ទ ទី២៨ ខែមីនា ឆ្នាំ២០១៦។
លោកប្រធានាធិបតីស៊ីរី បាហ្សា អាល់ អាហ្សាដ បានថ្លែងអបអរខ្លួនឯងចំពោះជ័យជម្នះក៏គាប់ប្រសើរនេះ ហើយខ្លួនអះអាងថា នឹងបន្តដំណើរនេះទៅមុខទៀត ស្របពេលដែលសម្ព័ន្ធមិត្តរុស្ស៊ី ក៏បានចេញសារ អបអរសាទរផងដែរ ចំពោះការដណ្តើមបានទីក្រុងនៃសម្បត្តិបេតិកភណ្ឌពិភពលោកខាងលើនេះ ត្រឡប់មក វិញ បើទោះបីជាវាបានទទួលរងការកម្ទេចស្ទើរគ្មានសល់ក៏ដោយ។
គួរបញ្ជាក់ថា ទីក្រុងបុរាណ Palmyra ជាទីក្រុងចំណាស់មួយដែលមានអាយុកាលរាប់ពាន់ឆ្នាំរបស់ស៊ីរី ហើយក្នុងនោះប្រាសាទបុរាណមួយចំនួនត្រូវបាន ISIS បំផ្ទុះកម្ទេចចោល។ មុនសង្គ្រាមមកដល់ ប្រជាជននៅទីក្រុងនេះមានចំនួនជាង ៧០,០០០នាក់៕

   
    
   

 

Loading...