ស៊ីរី: ក្រុមសកម្មជនក្នុងប្រទេស បាននិយាយថា យ៉ាងហោចណាស់ជនស៊ីវិលចំនួន ៤៣ នាក់ ត្រូវបានសម្លាប់ ដោយការវាយប្រហារតាមអាកាស ក្នុងតំបន់ដែលស្ថិតនៅក្រោមការគ្រប់គ្រងរបស់រដ្ឋអ៊ីស្លាម (IS) នៅភាគខាងជើង និងភាគខាងកើតនៃប្រទេសស៊ីរី កាលពីថ្ងៃពុធ។ នេះបើយោងតាមសារព័ត៌មានចិនស៊ិនហួ ចេញផ្សាយនៅថ្ងៃទី២៧ ខែកក្កដា ឆ្នាំ២០១៧។

ក្រុមឃ្លាំមើលសិទិ្ធមនុស្សស៊ីរី បានឲ្យដឹងថា ១៤ នាក់ ត្រូវបានសម្លាប់ បន្ទាប់ពីការវាយប្រហារតាមដែនអាកាស នៅភាគខាងកើតខេត្ត Deir al-Zour ហើយក្នុងចំណោមអ្នកស្លាប់ទាំងនោះ មានក្មេង ០៥នាក់ ដែលមានអាយុក្រោម ១៨ ឆ្នាំ និងស្ត្រី ០៤នាក់។

មកទល់ពេលនេះ គេនៅមិនទាន់អាចសន្និដ្ឋានបានទេថា យន្តហោះចម្បាំង ដែលបានបើកការវាយប្រហារនេះ ធ្វើទ្បើងដោយអាមេរិក ឬក៏រុស្ស៊ីនោះទេ។

តាមរបាយការណ៍ បានអះអាងថា ចំនួនអ្នកស្លាប់អាចនឹងកើនឡើង ខណ:ដែលមានចំនួនអ្នករងរបួសធ្ងន់ ជាច្រើននាក់។

ក្នុងនោះដែរ ក្រុមអ្នកង្កេតការណ៍ បានឲ្យដឹងទៀតថា ការវាយប្រហារតាមអាកាស កាលពីថ្ងៃពុធ បានសម្លាប់ជនស៊ីវិលយ៉ាងហោចណាស់ចំនួន ២៩ នាក់ នៅភាគខាងជើងទីក្រុង Raqqa ផងដែរ៕