សិង្ហបុរី: កងនាវាចរអាមេរិក នៅព្រឹកថ្ងៃច័ន្ទនេះ បាននិយាយថា សាកសពនាវិកខ្លួនទាំង ១០នាក់ ដែលបានបាត់ខ្លួន បន្ទាប់ពីនាវាពិឃាតអាមេរិក John S. McCain បានបុកគ្នាជាមួយនាវាដឹកប្រេងមួយគ្រឿង អំឡុងពេលធ្វើដំណើរនៅក្បែរច្រកសមុទ្រម៉ាឡាក់កា មកកាន់ប្រទេសសិង្ហបុរី កាលពីដើមសប្តាហ៍មុន ត្រូវបានរកឃើញហើយ។ នេះបើយោងតាមសារព័ត៌មានចិនស៊ិនហួ ចេញផ្សាយនៅថ្ងៃទី២៨ ខែសីហា ឆ្នាំ២០១៧។
សេចក្តីថ្លែងការណ៍ពីកងទ័ពជើងទឹកអាមេរិក បាននិយាយថា សាកសពនាវិកចំនួន ០៨ នាក់ ទើបត្រូវបានគេរកឃើញ តាមរយ:ការស្វែងរកនៅកន្លែងផ្សេងៗ បន្ទាប់ពីបំណែករបស់នាវា USS John S. McCain បានលិចលង់ ខណ:ដែលសាកសពនាវិកពីរនាក់ក្នុងចំណោមនោះ ត្រូវបានគេរកឃើញកាលពីសប្តាហ៍មុន។
សូមជំរាបថា ឧប្បត្តិហេតុខាងលើនេះ ត្រូវបានគេចាត់ទុកថា ជាគ្រោះថ្នាក់ដ៏ធំបំផុតទី០៤ នៅក្នុងកងនាវាចរអាមេរិកប្រចាំតំបន់ប៉ាស៊ីហ្វិក សម្រាប់ឆ្នាំនេះ ដែលវាបានជំរុញឲ្យមានការស៊ើបអង្កេត រួមទាំងការផ្អាកប្រតិបត្តិការចរាចរណ៍នាវា ជាបណ្តោះអាសន្នផងដែរ ដើម្បីសុវត្ថិភាព៕
មតិយោបល់