ហ្វីលីពីន: ប្រធានាធិបតីហ្វីលីពីន លោក រ៉ូទ្រីហ្គោ ឌុយទើតេ និងប្រធានាធិបតីអាមេរិកលោក ដូណាល់ ត្រាំ ដែលត្រូវបានគេដឹងថា មេដឹកនាំទាំងពីរតែងតែប្រកាន់យកតែគំនិតខ្លួនឯងនោះ នឹងជួបពិភាក្សាគ្នាដោយផ្ទាល់នៅថ្ងៃចន្ទ ស្របពេលមានការចោទសួរថាតើ ពួកគេនឹងចុះសម្រុងគ្នា ឬមានការឈ្លោះទាស់ទែងគ្នា ដែលអាចឲ្យប៉ះពាល់ដល់ទំនាក់ទំនងរវាងប្រទេសទាំងពីរ នាពេលអនាគត ឬយ៉ាងណា។ នេះបើយោងតាមសារព័ត៌មានCNN ចេញផ្សាយនៅថ្ងៃទី១០ ខែវិច្ឆិកា ឆ្នាំ២០១៧។
លោក ត្រាំ នឹងមកដល់ប្រទេសហ្វីលីពីន នៅថ្ងៃចុងសប្ដាហ៍នេះ ដើម្បីចូលរួមកិច្ចប្រជុំកំពូលមួយ នៅអំទ្បុងពិធីគម្រប់ខួប៥០ឆ្នាំ នៃសមាគមប្រជាជាតិអាស៊ីអាគ្នេយ៍។
ថ្លែងប្រាប់ក្រុមអ្នកសារព័ត៌មាននៅទីក្រុងម៉ានីល លោក ឌុយទើតេ បាននិយាយថា «ប្រសិនបើជំនួបនាពេលខាងមុខ លោក ត្រាំ ចង់សួរសំណួរលោកអំពីគោលនយោបាយបង្ក្រាបថ្នាំញៀននោះ លោកនឹងផ្តល់ចម្លើយដល់លោក ត្រាំ វិញថា «សម្រាកទៅ»។ វាមិនមែនជាការងាររបស់អាមេរិកទេ។ វាជាកិច្ចការរបស់ហ្វីលីពីន។ ខ្ញុំចេះមើលថែប្រទេសរបស់ខ្ញុំឲ្យបានល្អប្រសើរហើយ»។
ការព្រមានរបស់មេដឹកនាំដឹកនាំហ្វីលីពីន បានធ្វើទ្បើងក្នុងគោលបំណង ដើម្បីជៀសវាងការរិះគន់ទៅលើវិធានការដ៏សាហាវរបស់លោក ក្នុងការដោះស្រាយបញ្ហាជាច្រើននៅក្នុងប្រទេសហ្វីលីពីន អំទ្បុងពេលមានជំនួបជាមួយលោក ត្រាំ៕
មតិយោបល់