ចិន: រដ្ឋាភិបាលក្រុងប៉េកាំង បានជំរុញឲ្យរដ្ឋាភិបាលអាមេរិកបោះបង់ចោលនូវគំនិតធ្វើសង្គ្រាមត្រជាក់របស់ពួកគេ បន្ទាប់ពីក្រុងវ៉ាស៊ីនតោននិយាយថា ខ្លួនគ្រោងនឹងផលិតគ្រាប់បែកបរមាណូតូចៗជាច្រើនគ្រាប់។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី៥ ខែកុម្ភ: ឆ្នាំ២០១៨។
កាលពីថ្ងៃអាទិត្យ ក្រសួងការពារជាតិក្រុងប៉េកាំង បានលើកទ្បើងថា ប្រទេសដែលមានឃ្លាំងអាវុធនុយក្លេអ៊ែរធំបំផុត ក្នុងពិភពលោក មិនគួរឲ្យមានការរីកសាយភាយអាវុធនុយក្លេអ៊ែរនោះទេ។
ដោយការលើកថ្លែងរបស់ចិន បានធ្វើទ្បើងបន្ទាប់ពីយោធាអាមេរិក មើលឃើញថា អាវុធនុយក្លេអ៊ែររបស់ពួកគេ មានទំហំធំពេក លែងជាឧបករណ៍ទប់ស្កាត់ដ៏មានប្រសិទ្ធភាពដូចមុន ទើបជាហេតុចង់បង្កើតគ្រាប់បែកបរមាណូខ្នាតតូចវិញ។
ពាក់ព័ន្ធនឹងបញ្ហានេះ ប្រទេសរុស្ស៊ីក៏បានធ្វើការថ្កោលទោសផែនការនេះផងដែរ ខណ:រដ្ឋមន្ត្រីការបរទេសអ៊ីរ៉ង់ អះអាងថា ផែនការនេះ គឺកំពុងនាំពិភពលោកឆ្ពោះទៅរកការបំផ្លាញ៕
មតិយោបល់