វៀតណាម: មនុស្ស៣នាក់ និងឧទ្ធម្ភាគចក្ររបស់យោធា ប្រទេសវៀតណាម បានបាត់ដំណឹងពីប្រព័ន្ធរ៉ាដាកណ្ដាល នៅភាគខាងត្បូងនៃខេត្ត Bà Rịa-Vũng Tàu ខណ:ពេលកំពុងធ្វើការហ្វឹកហាត់ហោះហើរមួយ នៅព្រឹកថ្ងៃអង្គារនេះ។ នេះបើតាមការបញ្ជាក់ចុងក្រោយរបស់មន្ត្រីផ្នែកប្រព័ន្ធផ្សព្វផ្សាយ ពាក់ព័ន្ធករណីបាត់ឧទ្ធម្ភាគចក្រនេះ។

សារព័ត៌មានក្នុងស្រុក Dan Ti បានរាយការណ៍ឲ្យដឹងថា ឧទ្ធម្ភាគចក្រប្រភេទ Eurocopter EC 130 របស់យោធាប្រទេសវៀតណាម ដែលផលិតដោយក្រុមហ៊ុន Airbus Helicopters បានបាត់ទំនាក់ទំនងនៅ១៥នាទី បន្ទាប់ពីហោះហើរឡើងក្នុងការសមហ្វឹកហាត់ ហើយត្រូវគេសង្ស័យថា បានធ្លាក់ទៅក្នុងភ្នំមួយ ដែលមានចម្ងាយប្រមាណ៨០គីឡូម៉ែត្រ ពីទីក្រុងហូជីមិញ។

សេចក្ដីរាយការណ៍បន្ថែមថា នៅក្នុងឧទ្ធម្ភាគចក្រនេះ មានពីឡុតបើកបរម្នាក់ និងសិក្ខាកាមចំនួន២នាក់ផងដែរ។ ហើយបើតាមឆ្នាំព្រំដែនខេត្ត គេបានប្រទះឃើញផ្សែងខ្មួរខ្មាញ់ នៅក្បែរកន្លែងសង្ស័យធ្លាក់យន្តហោះនោះ ប៉ុន្តែក្រុមអ្នកជួយសង្គ្រោះនៅមិនទាន់អាចចូលទៅដល់កន្លែងកើតហេតុនៅឡើយទេ។

គួរជម្រាបផងដែរថា បើតាមសេចក្ដីរាយការណ៍ ក្នុងរយ:ពេល៤ខែចុងក្រោយនេះ ប្រទេសវៀតណាម បានជួបហេតុការណ៍ធ្លាក់យន្តហោះបន្តបន្ទាប់គ្នាចំនួន៣លើក ដែលបានសម្លាប់មនុស្សចំនួន១១នាក់៕