ក្រោយបើកសវនការកាលពីថ្ងៃទី ២១ សីហា ឆ្នាំ២០១៤ នាង អូ រស្មី អតីតតារាចម្រៀងប្រចាំផលិតកម្មឆ្លងដែន និងរៃមាស ត្រូវបានកំណត់ទោសចំនួន៧ឆ្នាំ ពីបទសញ្ចារកម្មដែលមានស្ថានទម្ងន់ទោស និងពីបទការជួញដូរមនុស្សខុសច្បាប់។ នាងត្រូវសាលាឧទ្ទររាជធានីភ្នំពេញ ប្រកាសសម្រាលទោសពី៧ឆ្នាំ មកត្រឹម៥ឆ្នាំ កាលពីខែកុម្ភ:ឆ្នាំ២០១៦ មុននេះ និងត្រូវគេបញ្ជូនចេញពីគុគព្រៃស តែមិនមានដំណឹងថាយកទៅឃុំនៅឯណានោះឡើយ។ អ៊ីចឹងហើយទើបមានការភ្ញាក់ផ្អើល នៅពេលដែលនាងបានទូរស័ព្ទមកដោយផ្ទាល់មាត់ថា ខ្លួនត្រូវគេបញ្ជូនទៅឃុំនៅគុក ក្នុងខេត្តប៉ៃលិន និងបានទទួលរងនូវសភាពធ្វើទុក្ខបុកកម្នេញយ៉ាងខ្លាំង តាំងពីបញ្ជូនទៅទីនោះ។

លោកសុះ ម៉ាច ថ្លែងប្រាប់ Post News មុននេះបន្តិចថា តារាចម្រៀងនាង អូ រស្មី បានខលមកលោកកាលពីព្រឹកថ្ងៃទី២៧ វិច្ឆិកា ដោយបានរៀបរាប់ថានាងត្រូវគេប្ដូរចេញពីគុគព្រៃស ទៅ គុកនៅខេត្តប៉ៃលិនចំនួន៥ខែមកហើយ ដោយការរស់នៅរបស់នាងនៅកន្លែងថ្មី មានការធ្វើទុក្ខបុកម្នេញពិបាកទ្រាំ។ នាងបានយំស្រែកសុំឲ្យលោកជួយអន្តរគមន៍ ដោយអះអាងថាការបញ្ជូននាងទៅកាន់គុកថ្មី គឺមានគេធ្វើបាបនាង និងថាមានសភាពរស់នៅគឺខុសប្លែកគ្នាខ្លាំងកាលពីនាងនៅគុកព្រៃស។ លោកសុះ ម៉ាច និយាយថា អូ រស្មី បានយំស្រែកសុំឲ្យលោកជួយនាង ប៉ុន្តែមិនបានប្រាប់ថាអ្នកណាធ្វើអ្វីនាងខ្លះ ហើយអ្នកនោះជាអ្នកជាប់ទោសដូចគ្នា ឬជាមន្ត្រីប្រចាំការនៅគុកនោះទេ។ នាងត្រឹមតែយំហើយសុំឲ្យលោកជួយសុំអន្តរាគមន៍ពីអង្គការសិទ្ធិមនុស្សឲ្យជួយប្ដូរនាងចេញពីគុគនៅខេត្តប៉ៃលិន និងថាបើជីវិតនៅតែដូចរាល់ថ្ងៃគឺនាងនឹងស្លាប់មុនថ្ងៃចេញពីគុក។ លោកនិយាយថា តាំងពីមានទោសជាប់ពន្ធនាគារ នាង អូ រស្មី តែងតែខលមកលោកសុំឲ្យ លោកជួយផ្ញើលុយ និងទិញនេះទិញនោះយកទៅឲ្យនៅគុគរហូត បន្ទាប់ពីគ្រួសារនាង ក៏រៀងសោះអង្គើយចំពោះនាង។ នាងខានខលមកលោកប្រមាណច្រើនខែមកហើយ ទើបលោកភ្ញាក់ផ្អើលក្នុងពេលដែលនាងខលមកលោកជាថ្មី ហើយក៏យំស្រែកតាមទូរស័ព្ទថា គេធ្វើបាបយ៉ាងខ្លាំងនៅគុកខេត្តប៉ៃលិន និងសុំឲ្យលោកជួយទៅសុំអង្គការសិទ្ធិមនុស្សឲ្យជួយ។ លោកថាទូរស័ព្ទដែល អូ រស្មី ខលមកគឺជាលេខខ្ចីគេ ទើបការទំនាក់ទំនងមានភាពស្មុគស្មាញ សម្រាប់ការចង់ជួប ។

Post News មិនអាចសុំការបកស្រាយពីពន្ធនាគារ នៅខេត្តប៉ៃលិន និងពីមន្ត្រីពន្ធនាគារ នៅព្រៃស ពីមូលហេតុដែលប្ដូរនាងទៅគុក នៅជាប់ព្រំដែនថៃ នោះទេ ប៉ុន្តែលោក អំ សំអាត មន្ត្រីអង្គការឃ្លាំមើលសិទ្ធិមនុស្សលីកាដូ បានហៅករណីនេះថាជាការរំលោភសិទ្ធិទណ្ឌិត ។ លោកថាអ្នកមានទោស គឺគ្រាន់តែត្រូវជាប់គុកបាត់បង់សេរីភាពប៉ុណ្ណោះ មិនអាចរងទុកបុកម្នេញណាមួយ ឬត្រូវបញ្ជូនយកទៅឃុំនៅខេត្តឆ្ងាយ ដែលមិនអាចឲ្យគ្រួសាររបស់ពួកគេ ទៅផ្ដល់កម្លាំងឲ្យបានទេ ។ លោកនិយាយថា«តាមច្បាប់ ទណ្ឌិតគឺមិនអាចឲ្យអ្នកណាធ្វើទុក្ខមិនថាផ្លូវកាយ និងផ្លូវចិត្តទេ ហើយចំពោះករណីបញ្ជូនគាត់ទៅឃុំនៅពីសមាជិកគ្រួសារគាត់ចឹងគឺរឹតតែមិនគួរ ខ្ញុំថាគ្រួសារគាត់អាចដាក់សំណើរសុំបញ្ជូនគាត់មកគុគនៅជិតៗវិញ ហើយមន្ត្រីនៅពេលដែលមានរឿងបែបនេះ គឺត្រូវតែឃ្លាំមើលថាអ្វីដែលទណ្ឌិតរាយការណ៍វាត្រូវឬអត់!»។ លោកថាអង្គការសិទ្ធិមនុស្សមានសិទ្ធិអន្តរាគមន៍លុះត្រាតែមានសំណើរពីជនរងគ្រោះ ឬពី សាច់ញាតិរបស់ជនរងគ្រោះ។ ប៉ុន្តែក្រោយពីទទួលដំណឹងនេះ លោកក៏អាចតាមដានពីការដង្ហើយហៅរបស់ទណ្ឌិត អូ រស្មី ផងដែរ ដើម្បីកុំឲ្យមានការរំលោភសិទ្ធិណាមួយផ្ទុយពីច្បាប់៕